Tags-Gham

nazar meñ un kā sarāpā basā liyā maiñ ne
ġham-e-firāq ko āsāñ banā liyā maiñ ne

na pūchh mujh se mire fart-e-shauq kā aalam
har ek ġham ko tirā ġham banā liyā maiñ ne

bhaḌak ke bujh gayā jab us kā har ek diyā
charāġh-e-dil ko shab-e-ġham jalā liyā maiñ ne

fareb-kār rafīqoñ kī ab nahīñ hājat
ki apne siine se ġham ko lagā liyā maiñ ne

vo aa ga.e davā-e-ġham-e-jāñ liye hue
lo aaj ham bhī qā.il-e-dast-e-duā hue

na kār-e-dil ke the laa.eq na kār-e-duniyā ke
jo kuchh kiyā to ġham-e-māh-o-sāl ham ne kiyā

diye tarāsh liye yaas ke añdheroñ se
ġham-e-firāq ko ḳhvāb-e-visāl ham ne kiyā

aisā uljhā huuñ ġham-e-duniyā meñ
ek bhī ḳhvāb-e-tarab yaad nahīñ

ye rah-e-ġham ke ḳham-o-pech ajab haiñ jin ko
ḳhush-nazar sāyā-e-gesu-e-rasā kahte haiñ

mere saare ḳhulūs kī daulat
baañT do jā ke ġham ke māroñ meñ

hoñToñ pe suḳhan ā.ankhoñ meñ nam bhī nahīñ ab ke
is tarah vo bichhḌā hai ki ġham bhī nahīñ ab ke

un ko gañvā ke haal rahā hai ye muddatoñ
aayā ḳhayāl bhī to baḌā ġham huā mujhe

kisī ko rulāo kisī ko jalāo kisī ko satāo kisī ko miTāo
ḳhudā.ī kā ġham kyā zamāne kā Dar kyā tumhārā zamāna tumhārī ḳhudā.ī

mujh ko sunñā hī nahīñ hai talḳhiyoñ kā falsafa
umr bhar to maiñ ne tanhā ġham sahejā kyā karūñ

ġham-ḳhvāriyāñ thiiñ sheva dil-e-dard-mañd kā
laakh ajnabī ho ishq kā maarā bhī dost thā

TuuTe haiñ na TūTeñge kabhī bojh se ġham ke
nāzuk haiñ magar ret kī dīvār nahīñ haiñ

jab maiñ tumheñ nashāt-e-mohabbat na de sakā
ġham meñ kabhī sukūn-e-rifāqat na de sakā

vahī rahā hai bahar-taur shādmāñ 'nayyar'
jo apne ġham meñ ġham-e-dīgarāñ samo baiThā

ġham-e-jānāñ ko jān-e-jāñ banā le dekh dīvāne
ġham-e-jānāñ se baḌh kar aur koī ġham nahīñ hotā

ġharīb-e-shahr suḳhan-āshnā ko tarseñge
ham ahl-e-ġham ke liye ġham kī vādiyāñ hoñgī