Tags-Gham

kaam husn-kāroñ kā āñsuoñ kī zau de kar kuchh kañval khilā denā
maut husn-kāroñ kī jab vo ḳhud shab-e-ġham meñ ye diye bujhāte haiñ

kyā ham ko satā.egā ġham-e-gardish-e-daurāñ
ham tujh se abhī ai ġham-e-jānāñ nahīñ guzre

shirk hai shirk ye ai vā.iz-e-āshufta-ḳhayāl
ġham-e-uqbā ko sharīk-e-ġham-e-duniyā bhī na kar

shadīd tund havā.eñ haiñ kyā kiyā jaa.e
sukūt-e-ġham kī sadā.eñ haiñ kyā kiyā jaa.e

mujhe jab se lagā hai nashsha-e-ġham
mujhe har nashsha halkā lag rahā hai

ruk gayā aañkh se bahtā huā dariyā kaise
ġham kā tūfāñ to bahut tez thā Thahrā kaise

tire ġham kī duniyā meñ ai jān-e-ālam
koī ruuh mahrūm-e-rāhat nahīñ hai

shahīdān-e-ġham haiñ subuk ruuh kyā kyā
ki us dil pe bār-e-nadāmat nahīñ hai

shab soz-e-ġham se sham.a-sifat be-qarāriyāñ
kyā kyā na mere dil ko rahīñ tere vāste

āñkhoñ se ḳhuuñ bahānā paḌā raat din mujhe
tab jā ke tere ġham ko kahīñ ġham kiyā gayā

aañsū kabhī malāl kabhī terā ġham kabhī
kyā kyā na mere zaḳhm kā marham kiyā gayā

basā-auqāt māyūsī meñ ye aalam bhī hotā hai
tabassum kī tahoñ meñ ehtimām-e-ġham bhī hotā hai

ḳhushī tanhā nahīñ aatī jilau meñ ġham bhī hotā hai
jahāñ hañstī haiñ kaliyāñ girya-e-shabnam bhī hotā hai

jise koī samajh le sādgī se hāsil-e-hastī
vo jab hāsil nahīñ hotā to āḳhir ġham bhī hotā hai

log sar phoḌ kar bhī dekh chuke
ġham kī dīvār TūTtī hī nahīñ

masarratoñ kī fazā meñ sadā vo rahte haiñ
jo ġham ke māroñ se milte haiñ mehrbāñ ban kar

vaqt ke saath guzar jaatā hai har ik sadma
vaqt har zaḳhm ko har ġham ko miTā detā hai

muntazir huuñ ġham ke is tūfān-e-abr-o-bād meñ
kab ghaTā kā shor kam ho kab havā thak kar gire

kisī kināre ke tiira sāyoñ meñ bhuul aa.e haiñ bār-e-ġham ko
vo barf kī choTiyāñ nigāhoñ ke dā.eroñ meñ bhar rahī haiñ

ġham ke maare to hazāroñ hī zamāne meñ mile
mere jaisā koī taqdīr kā maarā na milā