Tags-Gham

use bhī jaate hue tum ne mujh se chhīn liyā
tumhārā ġham to mirī aarzū kā zevar thā

mile jo mujh ko bhī fursat ġham-e-zamāna se
kisī ke sāmne zikr-e-bahār maiñ bhī karūñ

jalte rahnā us ke ġham kī aañch par
dard ban jā.egā darmāñ dekhnā

dard ġham ashk aur māyūsī
terī ummīd sab pe bhārī hai

tumhāre ġham ne hī baḳhshī hai ham ko ye hunar-mandī
hameñ ashko ko ab motī banānā ḳhuub aatā hai

dil hī dil meñ sulag ke bujhe ham aur sahe ġham duur hī duur
tum se kaun sī aas bañdhī thī tum se rahe ham duur hī duur

kar diyā faash tirā ġham le kar
rāz-e-ejāz-e-masīhā ham ne

mūnis-e-tāza haiñ ye dard-o-alam
muddatoñ kā rafīq hai ġham to

yuuñ rasā.ī tā-sahar mumkin nahīñ ai dil magar
sham.a kī sūrat shab-e-ġham meñ pighal kar raah chal

ḳhud apne shab-o-roz guzar jā.eñge lekin
shāmil hai mire ġham meñ tirī dar-badarī bhī

zahr-e-ġham kaam kar bhī chukā hai
muskurāhaT laboñ par vahī hai

mānind-e-'sirāj' soz-o-ġham meñ
jalne kuuñ bahār būjhtā huuñ

taskīn-e-dil kī ham ne bhī parvāh chhoḌ dī
har mauj-e-ġham ko hāsil-e-tūfāñ banā liyā

ham ne to apne dil meñ vo ġham ho ki ho alam
jo koī aa gayā use mehmāñ banā liyā

ham ahl-e-dil ne me.ayār-e-mohabbat bhī badal Daale
jo ġham har fard kā ġham hai usī ko ġham samajhte haiñ

lashkar-e-ġham kī kishvar-e-dil par
raat din ab chaḌhā.ī hotī hai

apnā paimāna-e-dil hai mai-e-ġham se labrez
buuñd se bāda-e-ishrat kī chhalak jaatā hai

ḳhvāb kī gum-shuda ta.abīr huuñ maiñ ik ajab zabt kī tasvīr huuñ maiñ
phir bhī in barf sī āñkhoñ meñ kabhī koī ġham hai ki pighal jaatā hai

aa ġharq-e-jām kar deñ mile haiñ jo ranj-o-ġham
paimāna merā bhar ki zamāna ḳharāb hai

tamāzatoñ meñ mire ġham ke saa.e meñ chalnā
añdherā ho to mirā hausla jalā lenā