Tags-Gham

naved-e-aish se bhī lutf-e-aish mil na sakā
libās-e-ġham hī meñ aa.ī agar ḳhushī aa.ī

ajab na thā ki ġham-e-dil shikast khā jaatā
hazār shukr tire lutf meñ kamī aa.ī

josh-e-junūñ kā daur nahīñ hai dil ke sukūñ kā daur nahīñ hai
ġham hai nayā kaise kam hogā aa.eñ aap na aa.eñ aap

zindagī meñ lag chukā thā ġham kā sarmāya bahut
is liye shāyad kamāyā ham ne kam paayā bahut

jo kabhī ye bāb-e-alam khulā the har ek halqa-e-chashm meñ
pas-e-parda-e-ġham-e-dostāñ faqat apne apne azaab se

vo ek tū ki tire ġham meñ ik jahāñ ro.e
vo ek maiñ ki mirā koī rone vaalā nahīñ

kabhī tire ġham meñ mujh ko ronā kabhī phir aaphī hai chupke honā
jo yaad aatā hai saath sonā to raat kaTtī hai kis fuġhāñ se

misl-e-habāb bahr-e-ġham-e-hādsāt meñ
ham zer-e-bār-e-minnat-e-āb-o-havā rahe

tanhā.i-e-shām-e-ġham ke Dar se
kuchh un se javāb pā rahā huuñ

ye duniyā ġham to detī hai sharīk-e-ġham nahīñ hotī
kisī ke duur jaane se mohabbat kam nahīñ hotī

shikva-e-ġham bhī gayā tāqat-e-goyā.ī bhī
bhuul jaatā huuñ koī baat jo yaad aa.ī bhī

rah ga.e haiñ ab to le de kar dil-e-barbād meñ
hasrat-e-dīdār kā ġham aur terī aarzū

kar rahe haiñ vo ehtimām-e-ġham
ab to merī ḳhushī ḳhushī na rahī

savāl hai ġham-e-hastī ke biit jaane kā
ye zindagī to bahar-hāl biit jaatī hai

vo raaz hai ye ġham aah jise pā jaa.e koī to ḳhair nahīñ
ā.ankhoñ se jab aañsū bahte haiñ aa jaa.e koī to ḳhair nahīñ

ehsās ko ġham buniyād na kar
ai ishq hameñ barbād na kar

suno kuchh dīda-e-nam bolte haiñ
jo chup the aaj vo ġham bolte haiñ

bekasī ke haal meñ yak aan maiñ tanhā nahīñ
ġham tirā siine meñ mere hamdam-e-jānī huā

talḳhī-e-hālāt-e-daurāñ kā bayāñ hai zindagī
dard-o-ġham kī ik musalsal dāstāñ hai zindagī

ek jalva sā nazar aatā hai
koī to hai mire ġham-ḳhāne meñ