Tags-Gham

visāl-e-yār mayassar na ho to kyā ġham hai
ḳhayāl-e-yār to hai jis ko dil-sitāñ kahiye

is rañg se uThā.ī kal us ne 'asad' kī na.ash
dushman bhī jis ko dekh ke ġhamnāk ho ga.e

nashtar-e-ġham na jis ko raas aayā
ziist us ko kabhī na raas aa.ī

ishq meñ hote haiñ myāñ-'mus.hafī' sau tarah ke ġham
go ġham-e-hijr hai itnā bhī na ghabrāo jī

ġham aur ḳhushī meñ farq na mahsūs ho jahāñ
maiñ dil ko us maqām pe laatā chalā gayā

qurbān-gāh-e-ġham pe chaḌhāne ke vāste
bachpan meñ kitne pyaar se paalā gayā huuñ maiñ

ḳharāb-e-dard hue ġham-parastiyoñ meñ rahe
ḳhushī kī khoj bahāna thī mastiyoñ meñ rahe

dard ko daulat-e-sāhab-nazarāñ kahtā huuñ
ġham ko sarmāya-e-īsā-nafasāñ kahtā huuñ

na pūchho jaan par kyā kuchh guzartī hai ġham-e-dil se
qarār aanā kahāñ kā saañs bhī aatī hai mushkil se

jaane kis sahrā-e-ġham meñ kho gayā
haa.e vo aañsū ki jo dariyā bhī thā

safed pattharoñ ke ghar, gharoñ meñ tīrgī ke ġham
hazār ġham kā ek ye ki tū bhī be-ḳhabar gayā

mujh se kisī ke sāmne royā nahīñ gayā
kitne hī ġham the jo mujhe andar se khā ga.e

is baar mile haiñ ġham kuchh aur tarah se bhī
āñkheñ haiñ hamārī nam kuchh aur tarah se bhī

sho.ala bhī nahīñ uThtā kājal bhī nahīñ bantā
jaltā hai kisī kā ġham kuchh aur tarah se bhī

ḳhūn-e-jigar āñkhoñ se bahāyā ġham kā sahrā paar kiyā
terī tamannā kī kyā ham ne jīvan ko āzār kiyā

ham to 'zafar' har aan usī ke ġham meñ Duube rahte haiñ
jis ne ġham kī daulat baḳhshī ham pe baḌā upkār kiyā

palkoñ pe saj rahe haiñ jo motī na roliye
jauhar haiñ ġham ke ġham ke tarāzū meñ toliye

shām-e-ġham-e-firāq ke pahlū meñ baiTh kar
aa.ī kisī kī yaad to chupke se ro liye

dekhā jo qadr ġham kī nahīñ hai jahān meñ
le kar vo biij dil meñ mohabbat se bo liye