Tags-Gham

dil ko ehsās ke us moḌ pe laa.ī hai hayāt
ab na merī hai ḳhushī aur na ġham merā hai

merī hastī ajiib hai yā-rab ab mujhe ḳhud pe iḳhtiyār nahīñ
ālam-e-be-ḳhudī meñ jiitā huuñ maiñ ġham-e-āshiqī meñ martā huuñ

hotī hai jo shīshe meñ to hotī nahīñ kuchh fikr
thoḌī sī bhī ho to ġham-e-fardā nahīñ hotā

maiñ ḳhud huuñ naqd magar sau udhār sar par hai
ajab vabāl-e-ġham-e-rozgār sar par hai

kaise diye jalā.e ġham-e-rozgār ne
kuchh aur jagmagā.e ġham-e-yār ke mahal

chhalnī yūñhī dil hai nīsh-e-ġham se
mizhgāñ kī na barchhiyāñ sambhāloñ

hujūm-e-ġham ke añdhere bhī dil meñ haiñ lekin
kisī kī yaad kī ujlī sī raushnī bhī hai

tujhe chand roza ḳhushī milī to milā mujhe ġham-e-dā.imī
vo tirī nazar kī talāsh thī ye mirī nazar kī talāsh hai

dard qaabū kā nahīñ kaash vo uTh kar shab-e-ġham
sarguzisht-e-dil-e-nāshād kā unvāñ ho jaa.e

agar na dard se is dil ko āshnā karte
ġham-e-hayāt kā kis tarah tajziyā karte

faroġh-e-nashā-e-mai se bhī jī bahal na sakā
bahut se ġham the jo mauj-e-subū ke saath aa.e

zabt kī had se guzar kar ḳhaar to honā hī thā
shiddat-e-ġham kā magar iz.hār to honā hī thā

nabh-manDal gūñjtā hai tere jas se
gulshan khilte haiñ ġham ke ḳhār-o-ḳhas se

ai 'fanā' terī taqdīr meñ
saarī duniyā ke ġham rah ga.e

ġham-e-hayāt kahānī hai qissa-ḳhvāñ huuñ maiñ
dil-e-sitam-zada hai rāz-dāñ huuñ maiñ

ye kah rahī hai nazar kī ġham-e-āfrīñ jumbish
kisī ke dil kī tabāhī kī dāstāñ huuñ maiñ

duniyā badal ga.ī thī koī ġham na thā mujhe
tum bhī badal ga.e the ye hairānī khā ga.ī

ravānī ġham kī jis meñ thī vo jauhar de diyā maiñ ne
ġhazal pyāsī thī jazboñ kā samundar de diyā maiñ ne

kaañp uTTheñ qasr-e-shāhī ke gumbad thartharā.e zamīñ mābadoñ kī
kūcha-gardoñ kī vahshat to jaage ġham-zadoñ ko baġhāvat to aa.e