Tags-Gham

yaad hai qissa-e-ġham kā mujhe har lafz abhī
haal jis dard kā jis rañj kā jab se pūchho

dil se bhulā ke zehn kī vīrāniyoñ kā ġham
dīvār-o-dar pe sab ne haiñ kyā kyā sajā.e rañg

vahāñ tamaddun-e-mashriq kī maut kā ġham hai
yahāñ adab ke janāza pe shor-e-mātam hai

aaj bhī tere liye sozish-e-ġham kam to nahīñ
zaḳhm-e-dil par tire hamdam koī marham to nahīñ

chāñdnī-rāt ke va.ade bhī vafā hote haiñ
ai ġham-e-dil ye sabab lā.eq-e-mātam to nahīñ

na vo āh-e-ġham na vo chashm-e-nam na vo laġhzisheñ haiñ qadam qadam
na vo kashmakash hai javāb meñ na vo valvale haiñ savāl meñ

magar hai us kī ināyat to ġham nahīñ kuchh bhī
vo mujh se ḳhush rahe bas phir to dil mirā ḳhush hai

maiñ ek ġham nahīñ sau jaan par uThā lūñgā
mire satāne se kah de ki dil tirā ḳhush hai

lafz hai kuchh aur ma.anī kuchh har misre meñ fankār hai ġham
aise vaise sher kī lazzat bāhar kuchh aur andar kuchh

gila kis se kareñ aġhyār-e-dil-āzār kitne haiñ
hameñ mālūm hai ahbāb bhī ġham-ḳhvār kitne haiñ

aap ke mahram asrār the aġhyār ki ham
dil-e-ġhamnāk ke tum rahte the ġham-ḳhvār ki ham

tumhāre diid kī hasrat bahut mushkil se niklegī
duā ban kar shab-e-ġham vo hamāre dil se niklegī

na tumhārā husn javāñ rahā na hamārā ishq javāñ rahā
na vo tum rahe na vo ham rahe jo rahā to ġham kā samāñ rahā

na vo dil hai ab na javāniyāñ na vo āshiqī kī kahāniyāñ
na vo ġham na ashk-fishāniyāñ na vo dard-e-dil kā nishāñ rahā

na sukūn-e-dil na qarār-e-jāñ na qayām-e-sabr koī zamāñ
ye sarishk-e-ġham kā hai kārvāñ ki yūñhī hamesha ravāñ rahā

milā jo kaam ġham-e-mo'tabar banāne kā
hunar us aañkh ko aayā na ghar banāne kā

bahut tavīl mirī dāstān-e-ġham thī magar
ġhazal se kaam liyā muḳhtasar banāne kā

kasrat-e-jaur-e-yār se sab haiñ ye mere juzv-e-tan
soz-o-malāl-o-yās-o-dard ranj-o-ġham-o-mehan huuñ maiñ

ġham-e-zamāna tire naaz kyā uThā.ūñgā
ki nāz-e-dost bhī kam mujh se sargirāñ se uThā

qadam qadam ġham-e-hijrāñ kī be-panāhī meñ
sunā rahī hai mohabbat kahāniyāñ pyāre