Tags-Gham

qaid-e-ġham-e-hayāt bhī kyā chiiz hai 'fanā'
rāh-e-farār mil na sakī umr-bhar phire

dair meñ yā haram meñ guzregī
umr tere hī ġham meñ guzregī

zindagī yād-e-dost hai yaanī
zindagī hai to ġham meñ guzregī

dil ko shauq-e-nashāt-e-vasl na chheḌ
ġham meñ guzrī hai ġham meñ guzregī

hashr kahte haiñ jis ko ai 'fānī'
vo ghaḌī sharah-e-ġham meñ guzregī

tasadduq ismat-e-kaunain us majzūb-e-ulfat par
jo un kā ġham chhupā.e aur ḳhud bad-nām ho jaa.e

na apnī sub.h kī ḳhushiyāñ na apnī shaam kā ġham
hamāre paas to jo kuchh thā vo parāyā thā

vo hañs rahā thā magar ashk-e-ġham na rok sakā
zarā sī baat pe jis ne hameñ rulāyā thā

ġham se nāzuk zabt-e-ġham kī baat hai
ye bhī dariyā hai magar Thahrā huā

ranj-o-ġham ishq-o-junūñ dard-o-ḳhalish soz-o-firāq
aise aise mile 'ḳhāvar' hameñ dam-sāz ki bas

ġham ko siine meñ chhupā.e hue rakhnā yaaro
ġham mahakte haiñ bahut raat kī raanī kī tarah

aaj jo log tire ġham pe hañse haiñ 'vālī'
kal tujhe yaad kareñge vahī 'fānī' kī tarah

haiñ pashemāñ vo mo.attal tujhe kar ke ai dil
ġham na kar phir usī mansab pe bahālī hogī

na hai vasl kī koī aarzū na to hijr kī koī guftugū
jo shikār ho ġham-e-ishq kā usī rāz-dāñ kī talāsh hai

mire dil meñ ġham kā jo ḳhaar hai mirā dil usī pe nisār hai
jise mere dard kā dard ho usī mehrbāñ kī talāsh hai

safar thā jab raushnī kī jānib to phir ma.āl-e-safar kā kyā ġham
charāġh kī tarah saarī shab shaan se jale sub.h bujh ga.e ham

har din chehra alag tarah kā hotā hai
ġham kī shakleñ bhī to roz badaltī haiñ

chale aao agar dam bhar ko tum to ye jaatā rahe fil-faur maraz
ki nahīñ hai ba-juz bīmārī-e-ġham mirī jaan mujhe koī aur maraz

rumūz-e-ġham se begāne ḳhushī kā raaz kyā jāneñ
qazā se Darne vaale zindagī kā raaz kyā jāneñ