Tags-Gham

ījād kiyā karte ho tum ġham ke khilaune
tum dil bhī koī aur nayā kyuuñ nahīñ dete

mausam-e-girya ek guzārish hai
ġham ke pakne talak Thahr mujh meñ

mujhe dhun ki kākul-e-zindagī jo bikhar ga.ī hai sañvār duuñ
tumheñ ġham ki ishq ke tazkire mire sher-o-fan se chale ga.e

tire gesuoñ se aziiz thiiñ jinheñ kā.enāt kī uljhaneñ
tirā ġham sameT ke ruuh meñ tirī anjuman se chale ga.e

mire dil ko 'qaisar'-e-be-navā koī ġham shikast na de sakā
ki ulajh ke saikḌoñ hādse mire bāñkpan se chale ga.e

ḳhush-nasībī se idhar ātish-e-ġham ḳhuub hai tez
dosto ab mirī hastī ko nikhar jaane do

yuuñ lage dard kī is dil se shanāsā.ī hai
mausam-e-ġham kī tabhī to ye lahar aa.ī hai

vo kashmakash-e-ġham hai ki maiñ kah nahīñ saktā
āġhāz kā afsos aur anjām kā Dar bhī

ġham ba-har-taur numāyāñ ho zarūrī to nahīñ
aadmī chāk-garebāñ ho zarūrī to nahīñ

vo qalandaroñ meñ shumār hai
ġham-e-zīst se use pyaar hai

ġham-e-āshiqī se jo pūchhiye
ye jahāñ bhī ujḌā dayār hai

muskurātā hai ġham-e-zīst meñ 'manzar' aise
phuul jis tarah gulistāñ meñ khile ḳhaar ke paas

shām-e-ġham kī zulmateñ haiñ aur sahrā-e-hayāt
dīda-e-bedār ko anjum-fishāñ karte chalo

tere ġham se to sukūn miltā hai
apne sho.aloñ ne jalāyā ham ko

vāqif haiñ ham ki hazrat-e-ġham aise shaḳhs haiñ
aur phir ham un ke yaar haiñ ham aise shaḳhs haiñ

maiñ hī apne dard-o-ġham likkhūñgā apne haath se
ye janāze aap se tahrīr ho sakte nahīñ

dil kī tasallī jab ki hogī guft o shunūd se logoñ kī
aag phuñkegī ġham kī badan meñ us meñ jaliye bhuniyegā

ġham ke māroñ kī sādgī dekho
māñgte haiñ ye har ḳhushī ro ke

koī ġham-ḳhvār nazar aa.e to Dar jaatā huuñ
ye bhī aaseb na ho qālab-e-insāni meñ

ham hī ġham-ḳhvār-e-tamannā the na so.e sub.h tak
jab dar-o-dīvār ko niiñd aa ga.ī ghar so gayā