Tags-Gham

rog aise bhī ġham-e-yār se lag jaate haiñ
dar se uThte haiñ to dīvār se lag jaate haiñ

katraneñ ġham kī jo galiyoñ meñ uḌī phirtī haiñ
ghar meñ le aao to ambār se lag jaate haiñ

ehsās-e-ḳhushī miT jaatā hai afsurda tabī.at hotī hai
dil par vo ghaḌī bhī aatī hai jab ġham kī zarūrat hotī hai

jise zavāl na ho vo koī kamāl nahīñ
kamāl-e-ġham ko hamāre magar zavāl nahīñ

ye kyā nahīñ nigah-e-fitna-sāz terī kamī
hamāre jazba-e-ġham meñ ab ishti.āl nahīñ

ġham ko ḳhud par savār mat karnā
zaḳhm ko ishtihār mat karnā

hausle se sahārnā ġham ko
dard ko be-vaqār mat karnā

kaifiyat kyā thī yahāñ ālam-e-ġham se pahle
kaun aayā thā tirī bazm meñ ham se pahle

sab karam hai tire andāz-e-sitam se ai dost
zauq-e-ġham dil ko na thā tere sitam se pahle

ġham-e-firāq meñ girye ko shaġhl samjhā thā
ḳhabar na thī mirī miTTī ḳharāb kar degā

ḳhamosh rah ke zavāl-e-suḳhan kā ġham kiye jaa.eñ
savāl ye hai ki yuuñ kitnī der ham kiye jaa.eñ

bhulā diye ġham-e-duniyā ne ishq ke ādāb
kisī ke naaz uThāne kī fursateñ bhī ga.iiñ

gayā vo daur-e-ġham-e-intizār-e-yār 'sahar'
aur apnī zaat pe dānista zahmateñ bhī ga.iiñ

dukh jo 'majrūh' ne sahe ġham se
us kā kyā sharh-e-mājrā kiije

ham dil the aur ik dil ke liye aa.e the 'sāgar'
par mauj-e-ġham-e-dahr bahā le ga.ī ham ko

hazāroñ ġham haiñ is manzil meñ manzil dekhne vaale
kaleja thaam le apnā mirā dil dekhne vaale

mere andar ik nayā ġham roz rakh jaatā hai kaun
rafta rafta ho rahī hai aur bhārī zindagī

apnā ġham le ke kahīñ aur na jaayā jaa.e
ghar meñ bikhrī huī chīzoñ ko sajāyā jaa.e

ab bhī zinda huuñ tirī ruuh meñ ġham kī sūrat
kaun kahtā hai ki TuuTā huā rishta maiñ huuñ

ik dil ke ujaḌ jaane kā ġham ho to kahāñ tak
aao ki ġham-e-dil hī ko ābād kareñge