Tags-Gham

laakh ġham siine se lipTe rahe nāgan kī tarah
pyaar sachchā thā mahaktā rahā chandan kī tarah

ab koī kaise pahuñch pā.egā tere ġham tak
muskurāhaT kī ridā Daal dī chilman kī tarah

ik ashk bhī nazr-e-ġham-e-jānāñ ko nahīñ paas
ham aaj bahut be-sar-o-sāmāñ nazar aa.e

palkoñ pe ġham-e-hijr ke sab diip jalā.e
nīñdoñ ke shabistān meñ bhārī mirī āñkheñ

ye rasm shab-e-ġham se hī ījād huī hai
ashkoñ ke sitāroñ se sañvārī mirī āñkheñ

dil to detā huuñ mirī jaan magar ġham hai yahī
mere armānoñ ne ghar is meñ banā rakkhā hai

nazar meñ rakhnā kahīñ koī ġham-shanās gāhak
mujhe suḳhan bechnā hai ḳharcha nikālnā hai

shab-e-va.ada kah ga.ī hai shab-e-ġham darāz rakhnā
ise maiñ bhī raaz rakkhūñ ise tum bhī raaz rakhnā

ek ġham hotā to siine se lagā letā koī
ġham kā ambār uThāne pe na pahuñchā āḳhir

nukta-chīñ hai ġham-e-dil us ko sunā.e na bane
kyā bane baat jahāñ baat banā.e na bane

aao ġham kā tavāf karte haiñ
ham faqat ik ḳhushī ke mujrim haiñ

tum dekh lo 'jamīla' ki dil ġham huā na ho
āñkhoñ meñ un ke kyuuñ hai nadāmat bharī huī

'dāġh' ab vasl kā visāl huā
yaar zinda ġham-e-judā.ī hai

ab na vo zauq-e-vafā hai na mizāj-e-ġham hai
hū-ba-hū garche koī terī misāl aayā thā

haqīqatoñ kā jalāl deñge sadāqatoñ kā jamāl deñge
tujhe bhī ham ai ġham-e-zamāna ġhazal ke sāñche meñ Dhaal deñge

maiñ na ġham-ḳhvār-e-shahanshā na talab-gār-e-kul
mujh pe kis vāste āshob-e-qayāmat utrā

ġham ho ki ḳhushī donoñ yaksāñ haiñ mohabbat meñ
kuchh ashk o tabassum par ham ġhaur nahīñ karte

ālām-o-ġham kī tund havādis ke vāste
itnā latīf dil mire parvardigār kyuuñ

jise dekh ke ġham bhī rasta badal de
vo chehra na jaane kahāñ lāpata hai

nazr-e-ġham shāyad har ashk-e-ḳhūñ-chakāñ karnā paḌe
kyā ḳhabar kitnī bahāroñ ko ḳhizāñ karnā paḌe