Tags-Gham

vaqt ġhamnāk savāloñ meñ na barbād kareñ
kuchh na kuchh sa.i-e-ilāj-e-dil-e-nāshād kareñ

tah meñ go hikmat-e-parvez hai raqsāñ lekin
kaam har ek ba-nām-e-ġham-e-farhād kareñ

ġham us ke atā kiye hue haiñ
ġham kā na kabhī malāl karnā

jaane is meñ ġham yā ḳhushī hai pahlī baar mohabbat kī hai
apne liye to baat na.ī hai pahlī baar mohabbat kī hai

raat phailī to sar-e-ḳhalvat-e-ġham
be-karāñ ban ga.ī tanhā.ī mirī

ranj-o-ġham se rābta merā na TuuTe ai ḳhudā
yuuñ huā to merī puurī shā.irī mar jā.egī

'sā.ib' na pūchh hāl-e-dil-e-ġham-zadah na pūchh
har saañs merī in dinoñ hai iztirāb meñ

mirī zindagī pe na muskurā mujhe zindagī kā alam nahīñ
jise tere ġham se ho vāsta vo ḳhizāñ bahār se kam nahīñ

lab par jo mire āh-e-ġham-ālūd nahīñ hai
iz.hār-e-mohabbat mujhe maqsūd nahīñ hai

bahār meñ tū na jaane kaise kahāñ pe ġham thā
ḳhizāñ meñ mujh ko pukārtā hai yahī bahut hai

kahāñ sabāt-e-ġham-e-dil kahāñ sarāb-e-sukūñ
vo ḳhush-nasīb hai mil jaa.e jis ko soz-e-darūñ

jafā kī dhuup meñ guzrī hai zindagī saarī
vafā ke naam pe jheleñge ġham to kyā hogā

kyā ġham jo kū-e-yār meñ hotā huuñ pā.emāl
fart-e-ḳhushī se ḳhaak nahīñ dil meñ jaa.e rañj

mujhe tum se mohabbat ho ga.ī hai
ġham-e-duniyā se fursat ho ga.ī hai

jahāñ meñ qadr-o-qīmat mere ġham kī
tire ġham kī badaulat ho ga.ī hai

insāniyat hai marg-e-musalsal se ham-kanār
māñgo duā hayāt rahe ġham se sarfarāz

dil hī jalne do shab-e-ġham jo nahīñ koī charāġh
kuchh ujālā to rahe ghar meñ sahar hone tak

ġham-e-ārzū kā 'hasrat' sabab aur kyā batā.ūñ
mirī himmatoñ kī pastī mire shauq kī bulandī

go muḳhtasar the bahut tere vasl ke lamhe
tamām umr tire ġham se dostī hī rahī