Tags-Gham

muhīt-e-āb meñ har saañs Doltī nayyā
ġham-e-vajūd juḌā hai ġham-e-hayāt ke saath

maiñ kunj-e-zāt se niklā to yuuñ huā ki 'atā'
kuchh aur phail gayā ġham bhī shash-jahāt ke saath

kitnī begāngī se dekhte ho
jab ġham-e-zindagī kī baat aa.ī

nauhagarān-e-shām-e-ġham tum ne sunā nahīñ magar
kaisā ajiib dard thā tez havā ke shor meñ

minnat-e-gosh-e-be-hisāñ kaun uThā.e ab 'salīm'
nauha-e-ġham milā diyā tez havā ke shor meñ

thoḌī sī ziist hai jo ḳhushī se nibhe to ḳhair
varna nishāt-o-ḳhurramī-o-ġham ye sab nahīñ

ye ḳhaas ri.āyat hai ki ab des meñ apne
ġham muft meñ miltā hai kamānā nahīñ paḌtā

udhar ḳhush sair-e-dariyā se hai vo nā-āshnā zālim
idhar ham ġharq-e-bahr-e-ġham haiñ aur nāpaid sāhil hai

soz-e-ulfat se vo kam-māya-e-ġham hai mahrūm
ātish-e-dil ko jo ashkoñ se bujhā detā hai

dil de ke ḳhush huuñ maiñ ki hifāzat kā ġham gayā
tujh se qarīb hai vo jo mujh se judā huā

lab se lagā to bhuul ga.e ham ġham-e-hayāt
sāġhar meñ koī tujh sā hasīñ hai chhupā huā

zamāna guzrā hai tūfān-e-ġham uThā.e hue
ġhazal ke parde meñ rūdād-e-dil sunā.e hue

hamāre dil ke andheroñ kā ġham na kar hamdam
hamāre dam se ye raste haiñ jagmagā.e hue

vo ho shuġhl-e-bāda-noshī ki tavāf-e-kū-e-jānāñ
ġham-e-zindagī ke maare koī kaam chāhte haiñ

ḳhud hī rañg-e-ruḳh-e-mahbūb uḌā jaatā hai
ham to rūdād-e-ġham-e-ishq sunāte bhī nahīñ

na ham ko sher-o-suḳhan se matlab na ishrat-e-anjuman se matlab
kisī ko 'iqbāl' dāstān-e-ġham-e-mohabbat sunā rahe haiñ

kab tak jahāñ se dard kī daulat sameTte
ḳhud apne dil ko ġham kā ḳhazīna banā liyā

ġham o hirmāñ kī yūrish hai masā.ib kī ghaTā.eñ haiñ
junūñ kī fitna-ḳhezī husn kī ḳhūnīñ adā.eñ haiñ

hāsil-e-narmī-e-shabnam-o-gil
ātish-e-ġham kā sail-e-ravāñ hai

kahāñ kho ga.e mere ġham-ḳhvār ab
ki tanhā huuñ chalne ko tayār ab