Tags-Gham

jeb apnā gul ne phāḌā bulbul muī 'muravvat'
kyuuñ apne ġham kā qissa tū ne kahā chaman meñ

dil ko ghere haiñ rozgār ke ġham
raddī meñ kho ga.ī kitāb koī

dil ko bhī ġham kā salīqa na thā pahle pahle
us ko bhī bhūlnā achchhā lagā pahle pahle

ġham kā dariyā mirī āñkhoñ meñ simaT kar pūchhe
kaun ro ro ke bichhaḌtā rahā pahle pahle

kahāñ kā sharqī kahāñ kā ġharbī tamām dukh sukh hai ye masāvī
yahāñ bhī ik bā-murād ḳhush hai vahāñ bhī ik ġham se jal rahā hai

har chand rah-e-ishq ke ġham saḳht haiñ lekin
is raah ke kuchh ġham hameñ pyāre bhī mile haiñ

jis ne duniyā bhar ke ġham apnā.e the
us ko duniyā ne kahā be-dard thā

ġham use bhī na thā bichhaḌne kā
merī āñkhoñ meñ bhī namī kam thī

purāne ġham kahāñ hijrat kareñge
dukānoñ par na.e ġham aa rahe haiñ

ġham-e-daurāñ se bachnā zindagī meñ ġhair-mumkin hai
ġham-e-jānāñ ko siine se lagā le jis kā jī chāhe

ek be-kaif sā tasalsul hai
koī ġham hai na shādmānī hai

sham-e-jāñ bhuul ga.ī kaise bhaḌak uThnā thā
shām-e-ġham sub.h-e-qayāmat nahīñ karne detī

afsurda huuñ ibrat se davā kī nahīñ hājat
ġham kā mujhe ye zo.af hai bīmār nahīñ huuñ

kahte kahte ġham kā fasāna
kaTtī raat saverā hotā

nāhaq shikāyat-e-ġham-e-duniyā kare koī
ġham hai baḌī ḳhushī jo gavārā kare koī

soz-e-ġham hī se mirī aañkh meñ aañsū aa.e
sochtā huuñ ki ise aag kahūñ yā paanī

daulat-e-ehsās-e-ġham kī itnī arzānī huī
niiñd sī shai ho ga.ī nāyāb aadhī raat ko

ham apne ġham ko ḳhushī meñ shumār kar leñge
ḳhizāñ ke daur meñ jashn-e-bahār kar leñge

fuġhān-e-ġham surūd-e-anjumīñ ma.alūm hotī hai
tapish dil kī bahār-e-yāsmīñ ma.alūm hotī hai

kareñ to kareñ kyā ki rasta nahīñ kuchh
usī kā hai ġham ġham ke maare bhī us ke