Tags-Gham

qātil ko ġham-gusār samajhtā huuñ ab 'ra.īs'
maqtal meñ zindagī kī duā māñgtā huuñ maiñ

har jashn-e-tarab-nāk pe majlis kā asar thā
har uḌte hue bose meñ gard-e-ġham-e-jāñ thī

ga.e mere dushman ke phūloñ meñ vo
mujhe ġham ke kāñToñ meñ uljhā ga.e

yuuñ bhī milī hai mujh ko mire zabt-e-ġham kī daad
aksar vo sar jhukā.e hue muskurā.e haiñ

hayāt-o-maut ke sañgam pe jī rahe haiñ ham
hamārā jashn-e-tarab bhī ġham-iltizām rahā

ek be-nām sī uljhan hai dil-o-jāñ pe muhīt
ek ġham naam sā ehsās-e-ziyāñ aaj bhī hai

ajab ye sher haiñ apne ki jin meñ ham bhī nahīñ
bas ek ġham kī sharārat hai ya.anī ham abhī haiñ

duniyā-e-ġham ko zer-o-zabar kar sake to kar
rahmat kī mujh pe ek nazar kar sake to kar

itne ḳhāmosh bhī rahā na karo
ġham judā.ī meñ yuuñ kiyā na karo

dāġh-e-ġham-e-firāq miTāyā na jā.egā
jaltā huā charāġh bujhāyā na jā.egā

nā-murādī meñ nashāt-e-ġham imkāñ thā ajab
ham kabhī shaad na ho paate magar ho ga.e ham

vafā kā mirī kyā silā dījiyegā
ġham-e-dil kī lazzat baḌhā dījiyegā

ḳhushī bāñTne ke nahīñ aap qaa.il
to ġham hī mujhe kuchh sivā dījiyegā

dil ġham se tire lagā ga.e ham
kis aag se ghar jalā ga.e ham

aatā hai yahī to ham ko ronā
yuuñ maut kā ġham bhulā ga.e ham

dil bas-ki hai dīvāna us husn-e-gulābī kā
rañgīñ hai usī rū se shāyad ġham-e-furqat bhī

sahrā kī chhāntā hai vo ḳhaak ḳhaak zarra
ik ajnabī sā ġham hai rusvā.ī chāhtā hai

tire ġham se dil shādmāñ dekhtā huuñ
tujhe rāhat-e-jāvedāñ dekhtā huuñ

rañj hai us rañj se ham ko to ġham us ġham se hai
jo shikāyat ham ko un se hai vo un ko ham se hai

na vo aarzū hai na justujū na koī tasavvur-e-rañg-o-bū
liye dil meñ dāġh-e-ġham-e-ḳhizāñ maiñ chaman se duur nikal ga.ī