Tags-Gham

tire ba.ad koī bhī ġham asar nahīñ kar sakā
koī sāneha mirī aañkh tar nahīñ kar sakā

nazm jo marne vāloñ ke ġham meñ likheñ
us ko ham ai miyāñ marsiya hī kaheñ

maiñ aur tum se tark-e-mohabbat kī aarzū
dīvāna kar diyā hai ġham-e-rozgār ne

so yuuñ huā ki pareshāniyoñ meñ piine lage
ġham-e-hayāt se muñh moḌte hue cigarette

hai ta.ajjub aaj tak bhī ishq kyoñ rusvā nahīñ
dard be-āvāz sā hai ġham kā bhī saaya nahīñ

shām-e-ġham so jā.ūñ tujh ko saath le kar sub.h tak
apne va.ade par use aanā thā vo aayā nahīñ

Tapke na ye ashk chashm-e-ġham se
jaa.e na ye mehmān aa kar

aziiz aa.e madad ko na ġham-gusār aa.e
zamāne bhar ko musībat meñ ham pukār aa.e

milegā tohfa-e-dil ke evaz nashāt ki ġham
kise ḳhabar hai ki jiit aa.e ham ki haar aa.e

ye aur baat hai dil ḳhuun ho gayā ġham se
nazar meñ aap kī ab bhī koī udaas nahīñ

ḳhushk āñkheñ muskurāte hoñT chehra mutma.in
yuuñ bhī aksar dāstān-e-ġham sunā.ī jaa.e hai

utnī shiddat kā ġham nahīñ tum ko
tum ne jitnī salāh le lī hai

kiyā dard-o-ġham ne mujhe nā-umīd
ki majnūñ ko ye hī thiiñ bīmāriyāñ

mirī baat kā jo yaqīñ nahīñ mujhe aazmā ke bhī dekh le
tujhe dil to kab kā maiñ de chukā use ġham banā ke bhī dekh le

ye jahān hai ise kyā paḌī hai jo ye sune tirī dāstāñ
tujhe phir bhī 'mullā' agar hai zid ġham-e-dil sunā ke bhī dekh le

aahoñ se kamī ġham meñ na hogī dil-e-nādāñ
phūñkoñ se kabhī aag bujhā.ī nahīñ jaatī

ham ko ġham-e-jahāñ ne dilāse bahut diye
bahlānā jāgte meñ to samjhānā ḳhvāb meñ

kuchh mire dil kā sukūñ nazr-e-ġham-e-yār huā
jo bachā gardish-e-ayyām ne rahne na diyā

jaañ se guzrīñ haiñ pa ġham hai to usī baat kā hai
mujh ko mere hī ḳhush-andām ne rahne na diyā

sar-e-ihāta-e-ġham raat bhar sañvarnā thā
tirī judā.ī meñ kār-e-hunar bhī karnā thā