Tags-Gham

ġham-e-jahāñ ho ġham-e-yār ho ki tīr-e-sitam
jo aa.e aa.e ki ham dil kushāda rakhte haiñ

vahī bai.at-e-ġham-e-hijr thī vahī kashf-e-hujra-e-vasl thā
maiñ murīd-e-halqa-e-ḳhvāb thā so qarīn-e-murshid-e-lab rahā

aap ne ahd kiyā hai mirī ġham-ḳhvārī kā
ab ijāzat ho to ye ahd mujhe yaad rahe

ḳhushī hī shart nahīñ lutf-e-zindagī ke liye
matā-e-ġham bhī zarūrī hai aadmī ke liye

ye kah do āshiq kā us sanam se dil-o-jigar ab ḳharāsh-e-ġham se
gire hai ashkoñ ke saath kaT kaT kabhī idhar ko kabhī udhar ko

ḳhushī milī to masāfat kā ġham bhulā baiThe
go rāh-e-zīst pe yuuñ kitne aable hue the

kisī kā ġham ho mire dil pe baar hotā hai
usī kā naam ġham-e-rozgār hotā hai

ajiib kashmakash-e-bahr-e-ġham meñ dil hai 'qamar'
na Dūbtā hai ye beḌā na paar hotā hai

ab aur sambhālī nahīñ jaatī tirī hurmat
yuuñ kar ġham-e-jānāñ merī nazroñ se utar jā

tū ne atā kiye haiñ mujhe kitne dard-o-ġham
is lutf-e-ḳhās kā maiñ sila dene ā.ūñgā

hai mirī ziist tire ġham se farozāñ jānāñ
kaun kahtā hai mujhe be-sar-o-sāmāñ jānāñ

ik taraf ġham-e-duniyā ik taraf tirī yādeñ
aaj kal hayūloñ se khelte haiñ saudā.ī

daḳhl ḳhushiyoñ kā mirī ziist meñ kaise ho ki jab
terā ġham bhī ġham-e-daurāñ kī badaulat aa.e

maiñ ġham kā sahrā ubuur karne ke ba.ad ḳhud se bichhaḌ gayā huuñ
ajiib rāh-e-najāt niklī ajiib rāh-e-farār dekhī

ātish-e-ġham ne magar phūñk diyā
dil se shole jo uThā karte haiñ

evaz-e-bāda ġham-e-sāqī meñ
ḳhūn-e-dil apnā piyā karte haiñ

havā-e-mausam-e-ġham us ke shahr jaa.e to
mire dukhoñ kī koī baat us se kah denā

mujhe zāfrān se zard-tar ġham-e-hijr-e-yār ne kar diyā
nahīñ aisā koī zamāne meñ mire haal par jo hañsā nahīñ

aisā nahīñ ki aaTh pahar be-dilī rahe
bajte haiñ ġham-kade meñ kabhī jal-tarañg bhī

mish.al-e-jāñ bhī jalā.ī na ga.ī thī ham se
aur palkoñ pe shab-e-ġham koī taarā bhī na thā