Tags-Gham

sar se dayār-e-ġham ke sanīchar utaar de
mañgal hai jis meñ jā ke vo jañgal uThā to lā

dekh to chiir ke pahlū meñ dikhā detā huuñ
juz ġham-e-yār koī is dil-e-vīrāñ meñ nahīñ

jin dinoñ ġham ziyāda hotā hai
aañkh meñ nam ziyāda hotā hai

dil hai apnā to ġham parā.e haiñ
haa.e kyā kyā fareb khaa.e haiñ

in añdheroñ se pare is shab-e-ġham se aage
ik na.ī sub.h bhī hai shām-e-alam se aage

jaañ ghul chukī hai ġham meñ ik tan hai vo bhī mohmal
ma.anī nahīñ haiñ bilkul mujh meñ agar bayāñ huuñ

balā-kash-e-ġham-e-getī hai jān-e-zār abhī
hayāt sar pe uThā.e hue baar abhī

mah-o-nujūm fasurda gul-o-saman giryāñ
hai kā.enāt mire ġham meñ sogvār abhī

dekhne vaale hasīñ aañkh bahut dekhte haiñ
jo pas-e-chashm hai ġham us ko bhī dekhā jaa.e

shor barpā hai ki nikle ho talāsh-e-ġham meñ
maḳhzan-e-ġham hai mirā dil yahīñ dāḳhil ho jaao

muntashir silsila-e-ġham ko to kartā jā.ūñ
saath hī saath magar ḳhud bhī bikhartā jā.ūñ

gūñjtī hai umr-e-vīrāñ meñ tamannā kī thakan
harf-e-ġham ko gumbad-e-jāñ kī sadā kah lījiye

jo yaad aa.eñ to dil ġham se phaTne lagtā hai
kisī aziiz kī palkoñ meñ vo jaḌe aañsū

hamāre beach kī duurī kabhī kam ho nahīñ saktī
tirī ḳhushiyāñ haiñ kal kī aur mere ġham purāne haiñ

rañj ġham us se chhupātā huuñ maiñ apne laakh par
paḌh hī letā hai vo chehra phir bhī jhuTlātā huuñ maiñ

qarīb aa ai mah-e-shab-e-ġham nazar pe khultā nahīñ kuchh is dam
ki dil pe kis kis kā naqsh baaqī hai kaun se naam bujh ga.e haiñ

rahī jo barq se mahfūz pāmāl-e-ḳhizāñ hogī
ġham-e-anjām-e-shāḳh-e-āshiyāñ yuuñ bhī hai aur yuuñ bhī

rahte haiñ is tarah se ġham-o-yās ās-pās
maiñ un se duur duur to ye mere paas paas

lazzat-e-ġham to baḳhsh dī us ne
hausle bhī 'adam' diye hote

ġham-e-hayāt ġham-e-rozgār be-vatanī
sukūn se jo Dhale kaash aisī shaam to aa.e