Tags-Gham

sun ke saarī dāstān-e-rañj-o-ġham
kah diyā us ne ki phir ham kyā kareñ

koī shai ek sī nahīñ rahtī
umr Dhaltī hai ġham badalte haiñ

shiddat-e-ġham meñ bhī zinda huuñ to hairat kaisī
kuchh diye tund havāoñ se bhī laḌ jaate haiñ

nigāh bāzār par nahīñ thī vagarna kyuuñ chāra-sāz-e-ġham ne
marīz ke nusḳha-e-shifā meñ ḳhulūs kā jaam likh diyā hai

hazāroñ ġham haiñ lekin bār-e-ġham dil par na rakkhūñgā
ye nāzuk ābgīna us pe maiñ patthar na rakkhūñgā

chalūñgā saath apne kārvān-e-sarḳhushī le kar
jilau meñ ab ġham-e-andoh kā lashkar na rakkhūñgā

ai jastgān-e-rah-e-ġham chale chalo aage
koī maqām ba-nām-e-bahisht-e-ḳhvāb bhī hai

kis ġham meñ bikharte rahe ākāsh pe taare
kyuuñ chāñd pareshān pareshān thā kal shab

ḳhushiyoñ ke bāzār meñ ġham bhī bikte haiñ
aur ġham ke bāzār to akasr lagte haiñ

ġham-e-hayāt se jab vāsta paḌā hogā
mujhe bhī aap ne dil se bhulā diyā hogā

judā.ī ishq kī taqdīr hī sahī ġham-ḳhvār
magar na jaane vahāñ un kā haal kyā hogā

fasāna qais kā logoñ se sun liyā hogā
ye merā qissa-e-ġham aap ne sunā bhī hai

ġham sabhī dil se ruḳhsat hue
dard be-intihā rah gayā

had chāhiye 'farāz' vafā meñ bhī aur tumheñ
ġham dekhnā na dil kī tab-o-tāb dekhnā

dil se kahtā hai ġham-e-ulfat-e-jānāñ dam-e-marg
tum to duniyā se chale maiñ rahūñ kis kā ho kar

chhoḌnā ai ġham-e-ulfat na kabhī saath us kā
kahīñ ghabrā.e mirā dil na akelā ho kar

ḳhushā ai soz-e-ġham terī badaulat
duāoñ par ināyat hai asar kī

abhī to ġham ko suḳhan karnā sahal hai 'ārif'
maqām-e-ijz-e-suḳhnavar bhī dekhnā hai mujhe

jo hai so pā.emāl-e-ġham hai 'mīr'
chaal be-Dol hai zamāne kī

mujhe shikast-e-nasheman kā ġham nahīñ lekin
ye sochtā huuñ ki ahl-e-chaman pe kyā guzrī