Tags-Gham

nahīñ hai ghar meñ maal o zar to kyā ġham
virāsat meñ magar qarze na rakhnā

kaun kahtā hai ki jañgal meñ nahīñ sher ko ġham
maiñ ne zaiġham meñ milā dekhā hai ġham do-baTā-chār

ik ye bhī to andāz-e-ilāj-e-ġham-e-jāñ hai
ai chāragaro dard baḌhā kyuuñ nahīñ dete

shiddat-e-ġham se milā ziist ko mafhūm nayā
ham samajhte the ki dil jiine se bhar jā.egā

is hujūm-e-rañj-o-ġham meñ ik zarā sā zahr bhī
zindagī ko is tarah se shāyad āsānī mile

naḳhchīr-e-mohabbat kā qissa nahīñ tūlānī
lutf-e-ḳhalish-e-paikāñ āsūdgi-e-fitrāk

afsāna-e-ġham yuuñ bhī dil-e-zār kahā hai
ik baar jo pūchhā hai to sau baar kahā hai

duniyā bhī milī hai ġham-e-duniyā bhī milā hai
vo kyuuñ nahīñ miltā jise māñgā thā ḳhudā se

dil ġham se bhī bezār hai ma.alūm nahīñ kyoñ
ye aish bhī ab yaar hai ma.alūm nahīñ kyoñ

aalam hama dildār hai ma.alūm nahīñ kyoñ
jo ġham hai ġham-e-yār hai ma.alūm nahīñ kyoñ

tirī mī.ād-e-ġham puurī huī ai zindagī ḳhush ho
qafas TuuTe na TuuTe meñ tujhe āzād kartā huuñ

duniyā ke ġham bhī ham ne usī meñ Dubo diye
'amjad' nigāh-e-nāz kā jab jaam aa gayā

dhartī par rakh deñ to dhartī ke TukḌe ho jaa.eñ
sabr o ġham kā patthar haiñ siine se lagā.e ham

qahqaha mārte hī dīvāna
har ġham-e-zindagī ko bhuul gayā

suno ye ġham kī siyah raat jaane vaalī hai
abhī azaan kī āvāz aane vaalī hai

inhīñ alfāz meñ hai merī kahānī 'afzal'
ġham ne jiine na diyā shauq ne marne na diyā

mere qadmoñ meñ hai aish-e-jāvedāñ
tere ġham kī haiñ karam-farmā.iyāñ

is kā bhī alam us kā bhī qalaq ye ġham bhī hameñ vo ġham bhī hameñ
jiine ko ġhanīmat samjhe the jiine meñ magar ārām nahīñ

ġham-e-ulfat meñ Duube the ubharnā bhī zarūrī thā
hameñ rāh-e-mohabbat se guzarnā bhī zarūrī thā