Tags-Gham

bache kis tarah se marīz-e-ġham na tum aa sako na bulā sako
yahī hālateñ haiñ to dekhnā koī dam meñ qissa tamām hai

kis qadar ġham-ḳhvār thā vo shahr aur hamdard log
is kā kuchh andāza apnī rā.egānī se huā

ġham sahe rusvā hue jazbāt kī tahqīr kī
ham ne chāhā aap ko ham ne baḌī taqsīr kī

tire roz-e-azal se farefta haiñ tire husn-o-jamāl ke shefta haiñ
tire ishq meñ ho ga.e kushta-e-ġham vahī kar ga.e qaul jo yaar kiyā

ashk-e-ġham vo hai jo duniyā ko dikhā bhī na sakūñ
aur gir jaa.e zamīñ par to uThā bhī na sakūñ

ye mire ġham kā fasāna hai rahegā lab par
terī rūdād nahīñ hai ki sunā bhī na sakūñ

dil kahāñ ek siyah-ḳhāna hai ranj-o-ġham kā
is qadar daaġh lage haiñ ki miTā bhī na sakūñ

manDī meñ ġham kā maiñ hī saudāgar huuñ
is ḳhātir maiñ daam ziyāda rakkhūñgā

kahā: āñkheñ nahīñ is ġham meñ bīnā.ī bhī jaatī hai
vo bole hijr kī shab hai zarā dushvār to hogī

dasht-e-ġham meñ sāya-e-gesū na DhūñDh
pattharoñ meñ dard kī ḳhushbū na DhūñDh

terī kamī satā.e har ġham meñ har ḳhushī meñ
rahtā hai aaj bhī tū is aañkh kī namī meñ

roiiñ bujhā ke mujh ko phir ġham-zada havā.eñ
maiñ sham.a-e-āḳhirī thī is shab kī tīrgī meñ

koh-e-ġham thā mirā in.ām-e-mohabbat shāyad
chaar jānib se uThālo kī sadā.eñ aa.iiñ

jashn barbād ḳhayāloñ kā manā luuñ to chalūñ
mizha-e-shauq ko ġham-sāz banā luuñ to chalūñ

merī hastī meñ simaT aa.e añdhere ġham ke
sham-e-ulfat kī tire ġham meñ jalā luuñ to chalūñ

apnī jagah sāhil sā Thahrā ġham terā
dil ke dariyā meñ ik halchal paiham sī

kyā karūñgā maiñ ab ḳhushī le kar
ġham se sairāb ho gayā huuñ maiñ

is qadar bār-e-ġham uThāyā hai
jhuk ke mehrāb ho gayā huuñ maiñ

dil-e-ġham-dīda par ḳhudā kī maar
siina aahoñ se chhil gayā merā

kahīñ yuuñ na ho ki kal ham ġham-e-yār se bhī jaa.eñ
chalo aa rahī rutoñ se vahī intizār māñgeñ