Tags-Gham

uThāyā usī ġham ne duniyā se pyāre
kabhī tum ne ham ko na tanhā biThāyā

aañkh bhar aa.ī guloñ ke chaak dāmāñ dekh kar
nashtar-e-ġham hai chaman kī dāstāñ mere liye

sher kahne kā salīqa kuchh nahīñ hai 'imtiyāz'
hai magar itnā ki ye rakhtā hai Tuk ġham kā tarāsh

jo qillat-e-sīm-o-zar kā ġham hai to aao qaisar ke jānashīno
tumhārī ḳhātir zarā jhukā duuñ maiñ apnā ye kāsa-e-gadā.ī

dard-o-ġham hī sahī ḳhushī na sahī
mujh ko jo kuchh diyā diyā tū ne

rāhat-afzā lagā mujhe har ġham
dard aisā jagā diyā tū ne

naam de kar ġham-e-mohabbat kā
kyuuñ fasāna banā diyā tū ne

mat pūchh jaur-e-ġham se dil-e-nā-tavāñ kā haal
bijlī to dekhī hogī kabhī kaah meñ paḌe

kār-e-bekār kā asāsa hai
mujh se be-jān ke sivā ġham bhī

soz-e-ġham de ke mujhe us ne ye irshād kiyā
jā tujhe kashmakash-e-dahr se āzād kiyā

ġham huuñ jo apne aap meñ ristā dikhā.ī de
dariyā meñ Duub kar hī kinārā dikhā.ī de

na terī yaad na duniyā kā ġham na apnā ḳhayāl
ajiib sūrat-e-hālāt ho ga.ī pyāre

'jalīl' ik sham-e-hasrat bujh ga.ī to ġham nahīñ is kā
abhī dāġh-e-jigar meñ raushnī ma.alūm hotī hai

girya, māyūsī, ġham-e-tark-e-vafā kuchh na rahā
zindagī rah ga.ī jiine kā mazā kuchh na rahā

dhīre dhīre chal diye us raah par ham bhī 'sabīn'
rāt-din sab jis ko ġham kī karbalā kahte rahe

kise ḳhabar hai ki har ġham meñ hai ḳhushī pinhāñ
ġham-e-habīb salāmat ye jaañ rahe na rahe

aañkh ke sāhil par aate hī ashk hamāre Duub ga.e
ġham kā sāvan itnā barsā saare sahāre Duub ga.e

kuchh aur vo huā na huā mujh ko dekh kar
yād-e-bahār-e-husn se ġhamnāk to huā

dukh se āġhāz aur ġham pe aḳhīr
ham ne paa.e baḌe in.aam ke din

mauj-e-dariyā ko piyeñ kyā ġham-e-ḳhamyāza kareñ
rag-e-afshurda-e-sahrā meñ lahū taaza kareñ