Tags-Gham

shīsha thā ik ġham-e-dil TuuT ke sāhil pe girā
muntashir ret ke har zarre kā shīrāza kareñ

ab dīdanī hai aap ke bīmār-e-ġham kā haal
māyūs aa rahe haiñ nazar chāra-gar tamām

raat bhar merī zabāñ par sar-guzasht-e-shām-e-ġham
un ke lab haiñ āshnā-e-lazzat-e-guftār-e-sub.h

ik tire ġham ke ujāloñ kī ridā.eñ mil jaa.eñ
zindagī jism kī ye mailī sī chādar badle

ġham-o-ālām ne is darja ham ko kar diyā ghāyal
ḳhud apnī dāstāñ ko ham se dohrāyā nahīñ jaatā

tum hamāre nahīñ to kyā ġham hai
ham tumhāre to haiñ ye kyā kam hai

ban gayā hai ye zindagī ab to
tujh se baḌh kar hameñ tirā ġham hai

har masarrat alam kā hai partav
jo ḳhushī hai amānat-e-ġham hai

ab maiñ huuñ aur shiddat-e-ġham kī hai tez dhuup
un gesuoñ ke saa.e ghanere chale ga.e

barbat-e-ġham se naġhme nikalne lage
zindagānī ke chashme ubalne lage

kab sar-e-dosh-e-havā ḳhaak faqat merī hai
ab to ye manzil-e-ġhamnāk faqat merī hai

ġham-e-firāq ke kushtoñ kā hashr kyā hogā
ye shām-e-hijr to ho jā.egī sahar phir bhī

is ġham ke ujāle meñ jo ik shaḳhs khaḌā hai
vo duur se mujh ko mirā sājan nazar aa.e

tishna hai mirā jaam to kuchh ġham nahīñ saaqī
ye ġham hai ki rindoñ ke bharam TuuT rahe haiñ

maiñ jin bahāroñ kī parvarish kar rahā huuñ zindān-e-ġham meñ hamdam
kisī ke gesū-o-chashm-o-ruḳhsār-o-lab kī rañgīñ hikāyateñ haiñ

maiñ apnī āñkhoñ meñ sail-e-ashk-e-ravāñ nahīñ bijliyāñ liye huuñ
jo sar-buland aur ġhayūr haiñ ahl-e-ġham ye un kī rivāyateñ haiñ

na jaane kaun sā ġham murtasim hai is dil par
ki mere hoñToñ ne kar lī hai ḳhāmushī mahfūz

vo hayāt kyā ki jis meñ na ḳhushī ke saath ġham ho
vo sahar bhī kyā sahar hai ki jo shaam tak na pahuñche

ai ġham-e-jāñ tire ġham-ḳhvāroñ kā
sabr ab had se sivā pahuñchā hai

dil meñ jab sozish-e-ġham aag lagā detī hai
chashm-e-afsurda kī barsāt se jī Dartā hai