Tags-Gham

mire zulmat-kade meñ roz-e-raushan kā guzar kaisā
salāmat hai shab-e-ġham to ujālā ho nahīñ saktā

kuchh saḳhti-e-duniyā kā mujhe ġham nahīñ 'ahsan'
khaTkā hai magar dil ko dam-e-bāz-pasīñ kā

ham ahl-e-ġham ko haqārat se dekhne vaalo
tumhārī naav inhīñ āñsuoñ se chaltī hai

chaman apne rañg meñ mast hai koī ġham-gusār-e-digar nahīñ
ki hai shabnam ashk-fishāñ magar gul-e-tar ko koī ḳhabar nahīñ

ġham-e-zindagī kā ilaaj to kabhī maut se bhī na ho sakā
ye vo saḳht qaid-e-hayāt hai kisī tarah jis se mafar nahīñ

mujhe ai 'figār' na mil sakā koī lamha sub.h-e-nashāt kā
mirī zindagī hai vo shām-e-ġham ki jo rūshanās-e-sahar nahīñ

ik ye bhī to andāz-e-ilāj-e-ġham-e-jāñ hai
ai chāragaro dard baḌhā kyuuñ nahīñ dete

sitam ho jaa.e tamhīd-e-karam aisā bhī hotā hai
mohabbat meñ batā ai zabt-e-ġham aisā bhī hotā hai

ba-dāvā-e-vafā kyuuñ shikva-sanj-e-jaur hai 'hasrat'
dayār-e-shauq meñ ai mahv-e-ġham aisā bhī hotā hai

dard-e-tanhā.ī se mar jaanā to kuchh mushkil na thā
kyā kaheñ ġham se magar kuchh ahd-o-paimāñ ho ga.e

zaḳhm-e-furqat ko tirī yaad ne bharne na diyā
ġham-e-tanhā.ī magar ruḳh pe ubharne na diyā

un kā ġham un kā tasavvur un kī yaad
kaT rahī hai zindagī ārām se

dard-mandāñ ko ba-juz dard nahīñ said murād
ai shah-e-malk-e-junūñ ġham ke bayābān meñ aa

ġham suuñ tere hai tarahhum kā mahal hāl-e-'valī'
zulm ko chhoḌ sajan sheva-e-ehsān meñ aa

mire habīb mirī muskurāhaToñ pe na jā
ḳhudā-gavāh mujhe aaj bhī tirā ġham hai

ubal paḌtā hai aafat kā kahīñ laavā to phir 'anjum'
ġham-o-andoh meñ ma.asūm chehra Duub jaatā hai

ho sakegī kis tarah sarf-e-qalam rūdād-e-dil
ab bhī zer-e-ġhaur surḳhī ġham ke afsāne kī hai

ik zaḳhm-e-judā.ī hai ki nāsūr banā hai
kartā huuñ tujhe yaad isī ġham ke bahāne

āzār-e-ġham-e-dil ko na honā thā shifāyāb
kuchh kaam kiyā 'chāñd' davā ne na duā ne

nāmvar phir kaun hogā kār-zār-e-dahr meñ
jab yahāñ dil sā alam-bardār-e-ġham gumnām thā