Tags-Gham

ġham-ḳhvāriyoñ kī tah meñ dabī sī masarrateñ
yuuñ mere paas bhī mire ġham-ḳhvār aa.e haiñ

kahte nahīñ zabān se 'at.har-shakīl' ham
ye to nahīñ ki ġham se aziyyat na ho hameñ

mushkiloñ meñ bhī vahī ishq tujhe thā mai kā
ġham salāmat rahe ḳhushiyoñ kā farishta dekho

shāmil hai sarisht-e-insāñ meñ tūl-e-shab-e-ġham kā unsur bhī
ye shām-e-firāq-e-ġham-āgīñ sub.h-e-shab-e-hijrāñ kuchh bhī nahīñ

vahī kuchh zindagī meñ zindagī kā bhed paate haiñ
jo paiham justujū karte haiñ barsoñ ġham uThāte haiñ

jo sach pūchho to ḳhud jiite haiñ aur jiinā sikhāte haiñ
vo dīvāne jo har tūfān-e-ġham meñ muskurāte haiñ

nūr-e-aflāk se raushan ho shab-e-ġham ki na ho
chāñd tāroñ se mirā naama o paiġhām to hai

ġham ke bharose kyā kuchh chhoḌā kyā ab tum se bayān kareñ
ġham bhī raas na aayā dil ko aur hī kuchh sāmān kareñ

ġham-e-furqat hī meñ marnā ho to dushvār nahīñ
shādi-e-vasl bhī āshiq ko sazā-vār nahīñ

tū hī anīs-e-ġham rahā nāla-e-ġham-gusār-e-shab
yās-pasand jab huā bismil-e-intizār-e-shab

vaqfa-e-umr ek dam haif hai vo bhī sarf-e-ġham
kis ko hai e'timād-e-roz kis ko hai e'tibār-e-shab

tū vo bad-ḳhū ki tahayyur ko tamāshā jaane
ġham vo afsāna ki āshufta-bayānī māñge

sukūt-e-marg ke gumbad meñ ik sadā ban ke
kabhī hisār-e-ġham-e-zīst se nikāl mujhe

ġham meñ tere haiñ ashk yuuñ jaarī
har ghaḌī jis tarah chale hai rahaT

dil-e-bechāra ik tan-e-tanhā
fauj-e-ġham aa.e hai tamām simaT

shab-e-ġham kī sahar nahīñ hotī
dāstāñ muḳhtasar nahīñ hotī

jis masarrat meñ ġham na ho shāmil
vo kabhī mo'atabar nahīñ hotī

ye ḳhud-fareb ujāle ye haath haath diye
diye bujhāo ki insān ġham ko pahchāne

tirī ḳhushī se agar ġham meñ bhī ḳhushī na huī
vo zindagī to mohabbat kī zindagī na huī

is qadar ġham hai ki iz.hār nahīñ kar sakte
ye vo dariyā hai jise paar nahīñ kar sakte