Tags-Gham

qurbateñ had se guzar jaa.eñ to ġham milte haiñ
ham isī vāste har shaḳhs se kam milte haiñ

jab the ḳhush-hāl bhale lagte the rishte ġham ke
ab vahī rishte mirī jaan kā āzār hue

ġhamoñ kī raakh se 'amjad' vo ġham tulūa hue
jinheñ nasīb ik āh-e-sahr-e-gahī bhī na thī

is liye ġham ko banā rakkhā hai apnā sāthī
tujh ko de dī hai ḳhushī saarī kī saarī ham ne

na hogī tāb-e-zabt-e-ġham jab un ko
yaqīnan ashk bhar laayā kareñge

maiñ kahtā hī rahūñgā qissa-e-ġham
vo sunte sunte so jaayā kareñge

kaun sā vo jaadū hai jis se ġham kī añdherī sard guphā meñ
laakh nisā.ī saañs diloñ ke rog miTāne aa jaate haiñ

dasht-e-ġham kī dhuup meñ mujh par khulā
maiñ ḳhud apnā sāya-e-dīvār huuñ

us se rūdād-e-ġham-e-dil maiñ kahūñ kaise 'tufail'
jab yaqīñ hai ki vo bad-zāt nahīñ mānegā

mujhe sitam meñ izāfe kā ġham nahīñ lekin
yaqīn kar ki mire ba.ad aa rahā hai koī

badalte mausamoñ ke saath ġham bhī aa.e lekin
ġhamoñ kī shaan alag thī is farāvānī se pahle

tū koī ġham hai to dil meñ jagah banā apnī
tū ik sadā hai to ehsās kī kamāñ se nikal

vahī ek suud o ziyāñ kā ġham jo mizāj-e-ishq se duur thā
vo tirī zabāñ pe bhī aa gayā to lagan hī jī kī bikhar ga.ī

raushnī bechne vaale ye ujāloñ ke safīr
bastiyāñ phūñk ke ġhamnāk huā chāhte haiñ

vahī ghuTan, vahī ma.amūl zindagī, vahī ġham
kahāñ maiñ jashn na.e saal meñ paḌā huā huuñ

jab tak ġham-e-ulfat kā unsur na milā hogā
insān ke pahlū meñ dil ban na sakā hogā

aarzū ko ruuh meñ ġham ban ke rahnā aa gayā
sahte sahte ham ko āḳhir ranj sahnā aa gayā

tumhārā ġham ġham-e-duniyā ulūm-e-āgāhī
sabhī azaab mire saath saath chalte haiñ

jab baḌhī had se ḳhushī bhiig ga.ī haiñ āñkheñ
ġham kī tahrīk hameñ jashn manāne se huī

itnā ġham pyaas kā apnī nahīñ 'najmī' ne kiyā
jitnī taskīn koī aag bujhāne se huī