Tags-Gham

sukūt-e-ġham kī adā adā ko samajh sakeñ kaash ahl-e-ālam
ishāra-hā-e-latīf bhī haiñ jabīñ pe naqsh-e-shikan se pahle

ai ishq ab ehsās se begāna banā de
varna kahīñ ġham-e-dil ko khilaunā na banā de

roz ik taaza ġham-e-dahr hai nāzil 'tābish'
ek tūfān-e-balā ne mirā ghar dekh liyā

saḳht sahī hastī ke marāhil-e-ishq meñ rāhat aaj bhī hai
ai ġham-e-jānāñ ho na gurezāñ terī zarūrat aaj bhī hai

ġham ke sailāb meñ phir bah gayā maskan merā
chain paayā hī thā ik bārish-e-ālām ke ba.ad

koī mujh sā mustahiqq-e-rahm-o-ġham-ḳhvārī nahīñ
sau maraz haiñ aur ba-zāhir koī bīmārī nahīñ

ishq kī nākāmiyoñ ne is qadar khīñchā hai tuul
mere ġham-ḳhvāroñ ko ab yārā-e-ġham-ḳhvārī nahīñ

ho gayā shāyad ki sarf-e-soz-e-ġham sab ḳhūn-e-dil
āñsuoñ kā ab vo dariyā aañkh se jaarī nahīñ

un ke pīchhe bhī koī ġham kā samundar hogā
varna aañsū na kabhī aañkh meñ khāre hote

ḳhabar nahīñ ki tirī yaad kyā tirā ġham kyā
magar vo dard jo hotā hai saañs lene meñ

nasheb-e-vādī-e-ġham meñ utar gayā hai koī
khaḌā huā hai koī aaj tak jharoke meñ

zindagī kitnī masarrat se guzartī yā rab
aish kī tarah agar ġham bhī gavārā hotā

ho ga.ī jamā matā-e-ġham-e-hirmāñ kyūñkar
maiñ samajhtā thā koī parda-e-ġhaflat meñ nahīñ

āñsūo thoḌī madad mujh ko tumhārī chāhiye
ġham chale jā.eñge varna dil ko banjar chhoḌ kar

jab se dil meñ tire baḳhshe hue ġham Thahre haiñ
mahram aur bhī apne liye ham Thahre haiñ

ġham ki har daur meñ Thahrā.e ga.e hāsil-e-zīst
aur is daur meñ ham sāhab-e-ġham Thahre haiñ

tirī yaad dastgīr-e-dil-e-ġham-zadā huī hai
mujhe saath le chalī hai ġham-e-do-jahāñ se aage

tire gesuoñ kī ḳhushbū ye payām de ga.ī hai
ki nashāt-bār saa.e haiñ ġham-e-tapāñ se aage

dūdmān-e-dard kī shādī haiñ ham
ḳhāndān-e-ġham kī ābādī haiñ ham

is kā nahīñ hai ġham koii, jaañ se agar guzar ga.e
dukh kī añdherī raat meñ ham bhī charāġh dhar ga.e