Tags-Gham

khul gayā ye raaz un āñkhoñ ke ashk-e-nāz se
kaifiyāt-e-husn ko ġham se judā samjhā thā maiñ

koī gauhar koī aadam na hogā
kisī ko rahzanoñ kā ġham na hogā

sūrat-e-ātish-e-ḳhāmosh jalā kartā huuñ
dekhtā huuñ shab-e-ġham aap tamāshā apnā

mere ġham ko bhī dil-āvez banā detā hai
terī āñkhoñ se mire ġham kā numāyāñ honā

khaa.e hai is maze se ġham-e-ishq merā dil
jaise gurisna maare hai halvā-e-tar pe haath

soch kī dīvār se lag kar haiñ ġham baiThe hue
dil meñ bhī naġhma na koī gungunāo chup raho

kyuuñ sharīk-e-ġham banāte ho kisī ko ai 'qatīl'
apnī suulī apne kāñdhe par uThāo chup raho

zarā sī der meñ bīmār-e-ġham huā ruḳhsat
palak jhapakte hī logoñ se rishta TuuT gayā

is se pahle ki ġham-e-kaun-o-makāñ ko samjho
ho sake gar to mire ġham kī zabāñ ko samjho

hai ġham-e-sūd-o-ziyāñ fikr-o-nazar kī pastī
āgahī ye hai ki āshob-e-jahāñ ko samjho

luTī luTī sī shab-e-ġham hai chāñdnī 'nayyar'
bujhā bujhā nazar aatā hai māhtāb mujhe

koī ḳhvāb thā jo bikhar gayā koī dard thā jo Thahar gayā
magar is kā koī bhī ġham nahīñ jo guzar gayā so guzar gayā

pahle hī kam hasīn kahāñ thā tumhārā ġham
pahnā diyā hai us ko ġhazal kā libās aur

ġham kī Dhalvān tak aa.e to ḳhushī tak pahuñche
aadmī ghaaT tak aa.e to nadī tak pahuñche

aaj bhī ġham kī salāmī ke liye
dil kā ābād nagar baaqī hai

ġham kisī kā ho gayā 'rāġhib' nasīb
varna is duniyā meñ kyā hai mustaqil

terā ġham terī aarzū kab tak
mujh se rūThā rahegā tū kab tak

'ārif' azal se terā amal momināna thā
haañ ġham ye thā ki fikr kā Dhab kāfirāna thā

na pattiyāñ haiñ na phal-phūl phir bhī chhāñv to dekh
sunā thā maiñ ne ki ġham kā shajar akelā hai

sham-e-giryāñ ko bhalā kyā azmat-e-ġham kī ḳhabar
koī parvāna kabhī aañsū bahā saktā nahīñ