Tags-Gham

un se mafhūm-e-ġham-e-zīst adā ho shāyad
ashk jo dāman-e-mizhgāñ ne sambhāle hoñge

ab to ye aalam magar vo ḳhush nahīñ maiñ bhī nahīñ
us kā har ġham mujh se aksar bāñTtī pāgal havā

ham ne likhe hurūf-e-ġham-e-jāñ varaq varaq
paḌhne ko gesū-o-lab-o-ruḳhsār rah ga.e

hamārī āzmā.ish kā agar kuchh ġham nahīñ hogā
to phir ye silsila-dar-silsila bhī kam nahīñ hogā

phir vo mā.il-ba-karam hone lage haiñ 'sāhir'
phir ġham-o-rañj ke āsār nazar aate haiñ

ġham-e-dil kā asar har bazm meñ hai
sab afsāne us afsāne se nikle

gar vo naqāb uThā de chehre se to 'hasan' phir
kuchh ġham nahīñ mah-o-mehr aalam meñ go na nikleñ

aatī nahīñ balā-e-shab-e-ġham nigāh meñ
kis mehr-vash kā jalva nazar meñ samā gayā

ratjage vo bhī nashāt-e-ġham-e-mahbūb ke saath
husn vāloñ ne baḌā kaam kiyā ho jaise

miT jā.egā har naqsh-e-ḳhayāl-e-ġham-e-hastī
lekin varaq-e-dil pe tirā naam rahegā

ġham kā jab koī manzar
haañ ba-faiz-e-bīnā.ī

kisī ne ġham to kisī ne mizāj-e-ġham baḳhshā
sab apnī apnī jagah chāragar hamāre hue

terā ġham ho ki ġham-e-dahr uThāne meñ hai kyā
kaam kyā hai jo ye bīmār nahīñ kar saktā

kahā lailā ne hai mujhe qais kā ġham mire dil ko hai us ke junūñ kā alam
nahīñ chain judā.ī meñ ab koī dam use vahshī-e-be-sar-o-pā kī qasam

ġham-e-daulat-e-vasl meñ ho ke hazīñ rah-e-ishq-o-vafā meñ haiñ ḳhāk-nashīñ
havas ab hameñ jāh-o-hasham kī nahīñ hameñ tere hī nashv-o-numā kī qasam

ai harīfān-e-ġham-e-gardish-e-ayyām aao
ek hī ġhol ke ham log haiñ haare hue log

'kāzim' kisī ke ġham kī rifāqat kā shukriya
mujh ko bhī kuchh charāġh jalāne diye ga.e

haiñ mardum-e-ġham-dīda ke dāñtoñ kī tarah band
misl-e-dahan-e-nañg hai zindān hamārā

le gayā 'kaif' salīboñ ko uThā kar koī
ġham ke māroñ ne kisī vaqt jo marnā chāhā

abhī nahīñ abhī zanjīr-e-ḳhvāb barham hai
abhī nahīñ abhī dāman ke chaak kā ġham hai