Tags-Gham

guloñ pe sāya-e-ġham-hā-e-rozgār mile
bharī bahār ke chehre bhī sogvār mile

jin se ġham intihā ke milte haiñ
un se ham muskurā ke milte haiñ

aaj bahut udaas huuñ
yuuñ koī ḳhaas ġham nahīñ

guzar ga.ī mirī rūdād-e-ġham meñ raat tamām
phir us ke ba.ad na sham.eñ jalīñ na parvāne

uf mire ġham-kade kī tārīkī
aap aa.e bhī to sahar na huī

arūz-o-ilm kī ta.alīm mujh ko kab rahī hāsil
mirā ustād to bas ye ġham-e-ayyām hai saaqī

sach hai ye hirs kartī hai insān ko ḳharāb
ġham khāyā is qadar ki maiñ bīmār ho gayā

banāyā hai shahkār yuuñ tere ġham ne
bahut daad paa.ī sar-e-bazm ham ne

lazzat-e-ġham se taḌapne meñ maza aatā hai
lazzat-e-ġham se tabī.at mirī bhar jaane do

vo mire ġham kā mudāvā nahīñ hone detā
zarra-e-dard ko sahrā nahīñ hone detā

mundamil zaḳhm hue the na hamāre dil ke
phir na.e ġham ko kiyā aaj hī mehmāñ ham ne

bin bulā.e hī chalī aa.ī shab-e-ġham dekho
dekhā 'dilshād' ko phir aaj pareshāñ ham ne

himmat to aa ga.ī thī dukh jhelne kī lekin
aayā hai ġham hī chal ke ik aur chaal ab ke

auroñ ko tū ne daulat-e-kaunain baañT dī
ġham mujh ko de diyā hai sazā-vār dekh kar

aaj us ne hañs ke yuuñ pūchhā mizāj
umr bhar ke ranj-o-ġham yaad aa ga.e

zahr zindagānī kā pī ke aql aa.ī hai
dārū-e-ġham-e-hastī talḳhī-e-subū meñ hai

ġham-e-zindagī ke fishār meñ tirī aarzū ke ġhubār meñ
isī be-hisī ke hisār meñ mujhe zindagī kī talāsh hai

jo ġham ke sho.aloñ se bujh ga.e the ham un ke dāġhoñ kā haar laa.e
kisī ke ghar se diyā uThāyā kisī ke dāman kā taar laa.e

kise batā.eñ ki ġham ke sahrā ko ḳhuld-dānish banāyā kaise
kahāñ se āb-e-ravāñ ko moḌā kahāñ se bād-e-bahār laa.e

har ek rāh-e-junūñ se guzre har ek manzil se kuchh uThāyā
kahīñ se dāman meñ ġham sameTā kahīñ se jholī meñ pyaar laa.e