Tags-Gham

yaad kī ḳhushbū dil ke nagar meñ phailegī
ġham ke saa.e lagte haiñ ab shītal se

kuchh ġham-e-jānāñ kuchh ġham-e-daurāñ donoñ merī zaat ke naam
ek ġhazal mansūb hai us se ek ġhazal hālāt ke naam

'azīz' terī mohabbat bhī rañg lā.egī
tamām hogā ġham-e-bekarāñ kabhī na kabhī

gar shab-e-ġham ko sahar chāho banānā 'āsī'
kisī salmā se ziyā-e-ruḳh-e-zebā māñgo

sāneha kyā thā tamīz-e-farhat-o-ġham miT ga.ī
ab koī rut ho hamesha ek sī rahtī huuñ maiñ

koī mausam ho kaisī hī fazā ho ġham nahīñ hotā
zamāne vaalā har ik rañg paidā kar liyā maiñ ne

ḳhushī mahsūs kartā huuñ na ġham mahsūs kartā huuñ
magar haañ dil meñ kuchh kuchh zer-o-bam mahsūs kartā huuñ

kabhī paatā huuñ dil meñ ek hashr-e-dard-e-betābī
kabhī maiñ apne dil meñ dard-o-ġham mahsūs kartā huuñ

ḳhushī kī mujh ko ab bahzād kuchh hājat nahīñ baaqī
ki ġham ko bhī maiñ ab un kā karam mahsūs kartā huuñ

dil-e-be-hausla hai ik zarā sī Thes kā mehmāñ
vo aañsū kyā piyegā jis ko ġham khānā nahīñ aatā

aatī jaatī saañs kaise tere ġham se man ga.ī
kyā batā.eñ zindagī ḳhud-raftagī kyuuñ ban ga.ī

reza reza chāñd palkoñ kī chaTānoñ par milā
raat kaale ġham kī aise jhaaḌ kar dāman ga.ī

dil kī gahrā.iyāñ kahāñ tak haiñ
'shauq' pūchho ye ġham ke māroñ se

nashāt-e-zīst mayassar nahīñ to kyā shikva
mujhe hayāt se baḌh kar hayāt kā ġham hai

talḳhi-e-ġham kā mudāvā ma.alūm
paḌ gayā zahr kā chaskā ham ko

tere ġham se to sukūn miltā hai
apne sho.aloñ ne jalāyā ham ko

jinheñ salīqa hai tahzīb-e-ġham samajhne kā
unhīñ ke rone meñ aañsū nazar nahīñ aate

raas aa.e mujhe murjhāte hue zard gulāb
ġham kā partav mire chehre kī bahālī niklā

ġham nahīñ mahfil-e-jānāñ meñ nahīñ sadr-nashīñ
us ne siine meñ to jaave hai mire kiine ko

ġham-e-jānāñ ġham-e-daurāñ kī guzargāhoñ se
guzre kuchh aise ki ḳhud apnī ḳhabar ho na sakī