Tags-Gham

tū agar mumkin nahīñ to ġham bhī terā kam nahīñ
ek shai hāsil sahī aur ek be-hāsil sahī

fart-e-ġham-e-havādis-e-daurāñ ke bāvajūd
jab bhī tire dayār se guzre machal ga.e

chhuTtā hujūm-e-ġham se mirā saath kis tarah
jaatā bichhaḌ ke mujh se mirā kārvāñ kahāñ

kam na samjho dahr meñ sarmāya-e-arbāb-e-ġham
chaar būñdeñ āñsuoñ kī baḌh ke tūfāñ ho ga.iiñ

uqda-hā-e-ġham se vābasta hai apnī zindagī
ham kahāñ ye mushkileñ jis vaqt āsāñ ho ga.iiñ

abhī na pūchhiye hāl-e-ġham-e-dil-e-'az.har'
abhī nazar meñ muqaddam ġhubār-e-vahshat hai

girdāb-e-ġham hai aur mirī kashtī-e-umīd
phir bahr-e-zindagī meñ hai tūfāñ uThā huā

ġham kā darmāñ sochne baiThe the jo raat ga.e
fikr-e-fardā le kar uTThe bazm-e-mai se log

nahīñ ye bhī shikva na aa.e na aa.e
guloñ ko mirā ġham sunāyā to hotā

kisī āñdhī kisī tūfāñ se bujhā.e na bujhā
dil meñ jaltā hī rahā ġham kā diyā ek baras

ek lamha bhī gavārā na thā furqat kā 'sarosh'
ye bhī kyā kam hai tire ġham meñ jiyā ek baras

roz ā.ankhoñ meñ utar jaatā hai ḳhanjar koī
in dinoñ ahl-e-nazar ko ġham-e-bīnā.ī hai

khulne ko hai qafas kā dar paane ko hai sukūñ nazar
ai dil-e-zār shām-e-ġham ham ko rulā chukī bahut

ġham kā ḳhamosh naġhma-e-dil-soz bhī 'nushūr'
ik kaif sā ragoñ meñ samotā chalā gayā

dastūr thā jo ġham kā purānā badal gayā
sambhle na the abhī ki zamāna badal gayā

tujhe kis tarah chhuḌā.ūñ ḳhalish-e-ġham-e-nihāñ se
dil-e-be-qarār lā.ūñ unheñ DhūñDh kar kahāñ se

sukūñ hī sukūñ hai ḳhushī hī ḳhushī hai
tirā ġham salāmat mujhe kyā kamī hai

baḌī umr ke ba.ad in āñkhoñ meñ koī abr utrā tirī yādoñ kā
mire dil kī zamīñ ābād huī mire ġham kā nagar shādāb huā

ulfat meñ mare to zindagī miltī hai
ġham laakh sahe tū ek ḳhushī miltī hai

sub.h-dam ek dīvār-e-ġham ban ga.e
ḳhār-zār-e-alam ban ga.e