Tags-Gham

baT ga.ī hai shiddat-e-ehsās-e-ġham kī bāzgasht
tiptipā.e dīda-e-pur-āb se ashkoñ kī guuñj

pā.emāl-e-ġham pise jaate haiñ surme kī tarah
le uḌī kis ke qadam se gardish-e-ayyām raqs

ġham hai kāñToñ kā na andesha bayābānoñ kā
ishq hai rāh-numā aaj bhī dīvānoñ kā

jashn-e-ġham-e-hayāt manāne nahīñ diyā
is muflisī ne zahr bhī khāne nahīñ diyā

ye hādisa bhī ajab hai ki tere dīvāne
lagā.e dil se ġham-e-rozgār phirte haiñ

mirī jaan aaj kā ġham na kar ki na jaane kātib-e-vaqt ne
kisī apne kal meñ bhī bhuul kar kahīñ likh rakhī hoñ masarrateñ

aarzū ko ruuh meñ ġham ban ke rahnā aa gayā
sahte sahte ham ko āḳhir ranj sahnā aa gayā

Thikānā phir ġham-e-duniyā ne paayā ba.ad muddat ke
ki apne hosh meñ phir 'mānī'-e-dīvāna aatā hai

garmī meñ ġham-e-libāda nā-zebā hai
mastī meñ ḳhayāl-e-bāda nā-zebā hai

ajiib ek masarrat se āshnā haiñ vo
asīr-e-ġham tire āshuftagāñ meñ koī nahīñ

girī hai merī jo dastār ġham huā lekin
ye shukr kartā huuñ band-e-qabā abhī tak hai

zabt-e-ġham-e-firāq kī majbūriyāñ na pūchh
dil meñ kisī kā naam liyā aur ro diye

kā.enāt-e-ġham meñ zehn ik ḳhalā hai
ḳhvāb kā parinda jis meñ aḌ rahā hai

dil-e-marhūm ko ḳhudā baḳhshe
ek hī ġham-gusār thā na rahā

hāsil-e-ġham yahī samajhte haiñ
maut ko zindagī samajhte haiñ

huuñ ajab aish-e-ġham kī hālat meñ
ab kisī se koī gila hī nahīñ

ye tishnagī ye pās-e-vafā ye hujūm-e-ġham
kyā kārvān-e-shauq kisī karbalā meñ hai

koī hamrāh nahīñ raah kī mushkil ke sivā
hāsil-e-umr bhī kyā hai ġham-e-hāsil ke sivā

vahshī-e-gesū ne dāġhā haath uḌaa.e gard-e-ġham
shāḳh-e-āhū-e-ḳhutan meñ gul hai gul meñ ḳhaak hai

mere dil meñ daaġh hai har daaġh meñ hai gard-e-ġham
andalībo is chaman meñ gul hai gul meñ ḳhaak hai