Tags-Gham

ġham-e-hāsil muqayyad kar rahā hai sa.ī-e-hāsil ko
mazāq-e-ārzū dīvār-e-zindāñ hai jahāñ maiñ huuñ

mujhe har yaum ishrat partav-e-rū-e-nigārīñ hai
shab-e-ġham sāya-e-zulf-e-pareshāñ hai jahāñ maiñ huuñ

kahāñ ke aish-o-ġham kaisī murādeñ kaise andeshe
ki saarī zindagī ḳhvāb-e-pareshāñ hai jahāñ maiñ huuñ

jo apnā ġham hai use ā.īna dikhā.ūñ maiñ
bas ek qatre meñ dariyā sameT lā.ūñ maiñ

vālī-e-shahr naġhmoñ kā qātil bajā par hameñ ġham hai kyā
fikr zinda ho jab tak mire shā.iro aas martī nahīñ

sāqiyā girya-e-ġham se mujhe majbūr samajh
ḳhuun ristā hai ye TuuTe hue paimāne se

ai mirī sharīk-e-ġham kaash tū samajh saktī
kitne an-bahe aañsū qahqahoñ meñ Dhalte haiñ

kuchh nahīñ hai aur to ġham hī sahī
is bharī duniyā meñ kuchh apnā to hai

hijr ke ġham ne mujhe maar diyā thā to kyā
mar ke jiinā bhī to sīkhā hai tirī yādoñ se

dil dhaḌaktā hai shab-e-ġham meñ kahīñ aisā na ho
marg bhī ban kar mizāj-e-yār tarsā.e mujhe

āñkhoñ meñ chhupā rakkhe haiñ ashkoñ ke ḳhazīne
ham ġham kī ināyāt se mahrūm kahāñ haiñ

tū hamesha māñgtā rahtā hai kyuuñ ġham se najāt
ġham nahīñ hoñge to kyā terī ḳhushī baḌh jā.egī

mujh se milne shab-e-ġham aur to kaun aa.egā
merā saaya hai jo dīvār pe jam jā.egā

ḳhushiyoñ ko to chhoḌā ham ne ik khel samajh kar 'anjum'
jis ġham ko rag-e-jāñ samjhā us ġham ne hameñ Thukrāyā

qaid āñkhoñ meñ hai bayābāñ bhī
ġham ke kuuze meñ ik nadī hī nahīñ

kyā zid kareñge tujh se ai gardish-e-zamāna
hañsnā bhī aa gayā hai ġham se bahal bahal kar

'gulnār' zabt-e-ġham kī ye intihā bhī dekhī
dāman bhigo rahe haiñ aañsū nikal nikal kar

apne ġhamoñ kā bojh uThā apne dosh par
tauhīn-e-ġham hai jānib-e-ġham-ḳhvār dekhnā

ye bār-e-ġham bhī uThāyā nahīñ bahut din se
ki us ne ham ko rulāyā nahīñ bahut din se

thā sharīk-e-bazm-e-ġham maiñ ham-navāñ koī nahīñ
dard-e-dil ko harf karne kā bayāñ koī nahīñ