Tags-Gham

chheḌe koī jo ġham kī baat terā bhī jaa.e dil pe haath
siine meñ dhaḌkanoñ ke saath tiir sā kuchh chubhā kare

ātish-e-shauq ho na kam baḌhtī hī jaa.e dam-ba-dam
lazzat-e-dilbarī se ġham tujh ko bhī āshnā kare

ḳhanda-e-gul hai jo zaḳhm-e-jigarī hai ai dost
mauj-e-ġham mauj-e-nasīm-saharī hai ai dost

kyā samā.e ġham-e-insāñ nigah-e-insāñ meñ
arsh-paimā.ī bhī fahm-basharī hai ai dost

āshnā ġham se milā rāhat se begāna milā
dil bhī ham ko ḳhūbī-e-qismat se dīvāna milā

saaqī sabhī ko hai ġham-e-tishna-labī magar
mai hai usī kī naam pe jis ke ubal paḌe

ġham bayāñ ho pyaas kā kuchh is tarah
ret se paanī nikalnā chāhiye

ab to jo shai hai mirī nazroñ meñ hai nā-pā.edār
yaad aayā maiñ ki ġham ko jāvedāñ samjhā thā maiñ

ġham meñ lazzat kahāñ ki dil na rahā
haa.e vo hasrat-āshna hī nahīñ

shaam kā ġham bhī jafākār udāsī merī
zaḳhm de jaatī hai har baar udāsī merī

hameñ na dekhiye ham ġham ke maare jaise haiñ
ki ham to vaise haiñ us ke ishāre jaise haiñ

ye ġham ke phuul haiñ yā sher dekhiye aur bas
hameñ pata hai ki ham ne nikhāre jaise haiñ

ham se ziyāda kaun samajhtā hai ġham kī gahrā.ī ko
ham ne ḳhvāboñ kī miTTī se paaTā hai is khaa.ī ko

inhī do bātoñ meñ kaT jaatī hai sab umr 'nadīm'
ai ġham-e-dahr na chheḌ ai ġham-e-yār aatā huuñ

ġham-e-daurāñ kā ho harā varna
aap kī yaad kab nahīñ dil meñ

kar to deñ qissa-e-daurāñ meñ tire ġham kā bayāñ
par lahū māñge hai ye fikr-e-rasā ham se bahut

ai 'dard' jā chukā hai mirā kaam zabt se
maiñ ġham-zada to qatra-e-ashk-e-chakīda huuñ

tumhāre ġham se tauba kar rahā huuñ
ta.ajjub hai maiñ aisā kar rahā huuñ

koh-e-ġham rakhtī hai dil par is ḳhirām-e-nāz se
ḳhajlat-e-raftār-e-kabk-e-kohsārī khīñch kar

ḳhamoshī jo kabhī thī parda-e-ġham
yahī ġhammāz hotī jā rahī hai