Tags-Gham

un kā ġham hai apnā ġham hai apne parā.e sab kā ġham
shahr-e-vafā meñ phir bhī 'farhat' aur ka.ī ġham-ḳhāne haiñ

jāgte ġham bhī nahīñ jhūmte saa.e bhī nahīñ
saath apne bhī nahīñ aur parā.e bhī nahīñ

ārzuoñ ke umañgoñ ke mazāroñ pe kahīñ
ġham-e-ayyām ne do phuul chaḌhā.e bhī nahīñ

tere ġham ko ye barahna nahīñ rahne detī
merī āñkhoñ pe jo ashkoñ kī ridā aatī hai

sukūn de na sakīñ rāhateñ zamāne kī
jo niiñd aa.ī tire ġham kī chhāñv meñ aa.ī

kabhī nasīb kī bhūle se bhī sahar na huī
baġhair hasrat-o-ġham zindagī basar na huī

jo ġham jalte haiñ sheroñ kī chitā meñ
unheñ phir apne siine se lagā.eñ

maḳhmūr thā nashe meñ ġham-e-rozgār ke
hosh aa gayā to umr kā paimāna bhar gayā

aap ik buuñd bhī pī leñ to ġhashī aa jaa.e
ġham ke aañsū jo asīrān-e-qafas piite haiñ

ta.amīr dozaḳhoñ meñ ho shaddād kī bahisht
jannat ko chhoḌ aa.e to ġham dūsrā milā

uftād tabī.at se is haal ko ham pahuñche
shiddat kī mohabbat meñ shiddat hī ke ġham pahuñche

kuchh lab pe kuchh āñkhoñ meñ le aa.e sajā kar ham
jo rañj ki haath aa.e jo ġham ki baham pahuñche

ye sitāre jo chamakte haiñ pas-e-abr-e-siyāh
tere ġham ko mirī aadat nahīñ banñe dete

na koī sar ko hai saudā na koī sañg se laag
koī pūchhe to kuchh aisā ġham-e-duniyā bhī nahīñ

ham ahl-e-dil ne me.ayār-e-mohabbat bhī badal Daale
jo ġham har fard kā ġham hai usī ko ġham samajhte haiñ

palak se is tarah Tapkā ki goyā ik kalī chaTkī
ham ahl-e-dard ashk-e-ġham ko bhī shabnam samajhte haiñ

vo jis se duur ho jaa.e ġham-e-jānāñ ġham-e-daurāñ
usī daur-e-sharāb-e-arġhavāñ kā zikr karne do

ai 'guhar' kyuuñ ḳhushī ke dāman meñ
mere ġham ko samo rahe ho tum

ġham to ḳhair apnā muqaddar hai so is kā kyā zikr
zahr bhī ham ko ba-sad-shauq gavārā hotā

jo dard-e-dil kaho āhista bolo
ḳhushī se ġham saho āhista bolo