Tags-Gham

kahīñ chhupā.e se chhuptī bhī hai haqīqat-e-ġham
vo ġham hī kyā jo masarrat se āshkār nahīñ

ziyāñ kī zad pe duniyā meñ ka.ī log aur bhī hoñge
to phir ai nā-murādī tū mire ġham kā sahārā ho

purāne ġham tire to juzv-e-jāñ ham ne banā Daale
bisāt-e-dil kī ḳhvāhish hai na.e ġham kā utārā ho

yaaro har ġham ġham-e-yārāñ hai qarīb aa jaao
pyāro phir fasl-e-bahārāñ hai qarīb aa jaao

jaan pyārī hai ki tum bhī ho mirī jaan ke saath
ġham-e-jāñ hī ġham-e-jānāñ hai qarīb aa jaao

bas ek zaḳhm thā dil meñ jagah banātā huā
hazār ġham the magar bhūlte-bisarte hue

maiñ sunā.ūñ kyā koī dāstāñ ki subūt-e-ġham bhī nahīñ rahā
mire ishq naame ko le gayā koī tāq-e-jāñ se nikāl ke

har ek jalva-e-rañgīñ mirī nigāh meñ hai
ġham-e-firāq kī duniyā dil-e-tabāh meñ hai

mirī zindagī hai zālim tire ġham se āshkārā
tirā ġham hai dar-haqīqat mujhe zindagī se pyārā

mujhe guftugū se baḌh kar ġham-e-izn-e-guftugū hai
vahī baat pūchhte haiñ jo na kah sakūñ dobāra

muddatoñ kashmakash-e-yās-o-tamannā meñ rahe
ġham ne jiine na diyā shauq ne marne na diyā

sitāroñ kī bhī umreñ ho ga.iiñ ḳhatm
na hogā qissa-e-ġham muḳhtasar kyā

mujh ko zamāne-bhar ke ġhamoñ se najāt hai
jab se hai merā dil tire ġham kī panāh meñ

ik silsila havas kā hai insāñ kī zindagī
is ek musht-e-ḳhāk ko ġham do-jahāñ ke haiñ

tū hī jab qissa-e-ġham se mire ghabrātā hai
phir sune kaun mire ġham kī kahānī sanamā

dard ko daulat-e-sāhab-nazarāñ kahtā huuñ
ġham ko sarmāya-e-īsā-nafasāñ kahtā huuñ

jhulas rahā huuñ maiñ sadiyoñ se ġham ke sahrā meñ
magar hai abr-e-gurezāñ kī phir bhī aas mujhe

ye risāla ishq kā hai adaq tire ġhaur karne kā hai sabaq
kabhī dekh is ko varaq varaq mirā siina ġham kī kitāb hai

haa.e vo dāstān-e-ġham jis kī
ḳhāmushī tarjumān hai pyāre

kabhī ḳhushī kabhī ġham ke payām aate haiñ
kisī ke ishq meñ kyā kyā maqām aate haiñ