Tags-Gham

tirī samajh meñ na aa sakegī kisī ke ashkoñ kī qadr-o-qīmat
abhī hai nā-āshnā-e-ġham tū abhī tirā dil dukhā nahīñ hai

vafā kī azmat se āshnā haiñ kaheñ to rūdād-e-ġham kaheñ kyā
tujhe nadāmat ho jis ko sun kar vo dāstān-e-vafā nahīñ hai

shām-e-ġham dard-e-dil baḌhāne ko
chāñd ke saath chāñdnī aa.ī

aa ga.e yaad ġham zamāne ke
kabhī bhūle se jo hañsī aa.ī

kāhish-e-ġham ne jigar ḳhuun kiyā andar se
ham ne bāhar bhī yahī zahr piyā andar se

aah naale dard-o-ġham aḳhtar-shumārī raat kī
ai masīh-e-vaqt in sab kī davā to ek hai

kār-zār-e-dahr meñ kyā nusrat-o-ġham dekhnā
ek bas apnā alam aur apnā parcham dekhnā

phir koī sāneha huā hogā
mehrbāñ kyuuñ haiñ ġham-gusār bahut

har sub.h maiñ ne ḳhud ko ba-mushkil baham kiyā
aa.ī jo ġham kī raat to bikhrā ga.ī mujhe

ġham-e-daurāñ meñ kahāñ baat ġham-e-jānāñ kī
nazm hai apnī jagah ḳhuub magar haa.e ġhazal

apnā ġham de kar vo ruḳhsat ho gayā
dil mirā royā ḳhushī meñ der tak

shab-e-tanhā.ī aur tū aur ye
ai 'qalaq' terī ġham-gusār hai sham.a

dīmak kī tarah chaaT rahā hai jo kaun hai
kis ġham meñ ghul rahā huuñ mujhe kuchh nahīñ patā

chand sheroñ meñ kahāñ Dhaltī hai ehsās kī aag
ġham kā ye rañg nikharnā to abhī baaqī hai

'zahīr' vo bhī samajhte haiñ ab zabān-e-ġhazal
chhupāo laakh ġham-e-hijr isti.āroñ meñ

shab-e-ġham meñ zindagī kā kise e'tibār hotā
mirī jaan jā chukī thī jo na intizār hotā

mirī dāstān-e-ġham ko vo ġhalat samajh rahe haiñ
kuchh unhīñ kī baat bantī agar e'tibār hotā

ye zamāna baḌh rahā hai faqat iztirāb-e-dil se
shab-e-ġham na yuuñ Thahartī jo mujhe qarār hotā

bahr-e-ġham meñ dil kā qarīna
lākhoñ maujeñ ek safīna

ho āñkheñ to dekh mere ġham kī tahrīr
paḌhnā ho to paḌh dīda-e-nam kī tahrīr