Tags-Gham

apnī rau meñ mast o ġhazal-ḳhvāñ
mauj-e-havā-e-ġham rahtī hai

talavvun-e-aish-o-ġham se bāham zamīn ye nañg-e-āsmāñ hai
ki muñh se ham ḳhuun Dālte haiñ vo rañg-e-nau-roz uchhālte haiñ

roktā hai ġham-e-iz.hār se pindār mujhe
mere ashkoñ se chhupā le mire ruḳhsār mujhe

ik na.e ġham se shanāsā kiyā mahrūmī ne
zindagī jab bhī tirī bazm meñ laa.ī mujh ko

ġham-e-hayāt ġham-e-dil nishāt-e-jāñ guzrā
tumhāre saath har ik lamha shādmāñ guzrā

basā ke dil meñ tire ġham tire sitam ai dost
jahāñ jahāñ se bhī guzrā maiñ naġhma-ḳhvāñ guzrā

kuchh ehtimām na thā shām-e-ġham manāne ko
havā ko bhej diyā hai charāġh laane ko

mujhe ab kyā kisī shai kī zarūrat
tirā ġham jab matā-e-jāvedāñ hai

in sulagte hue lamhoñ se ye miltā hai surāġh
dam-ba-dam TuuT rahā hai shab-e-ġham kā jaadū

ajab na thā ki ġham-e-dil shikast khā jaatā
hazār shukr tire lutf meñ kamī aa.ī

ġham-e-jahāñ ko ġham-e-zīst ko bhulā ke piyo
hasīn giit mohabbat ke gungunā ke piyo

ġham-e-hayāt kā darmāñ haiñ ishq ke aañsū
añdherī raat hai yaaro diye jalā ke piyo

ik zarā chain bhī lete nahīñ 'tābish'-sāhab
mulk-e-ġham se na.e farmān nikal aate haiñ

aḳhgar-e-ġhuncha āb-jū gard-e-chaman nasīm-e-sub.h
haiñ ye girah-kushā-e-ġham ātish-o-āb o ḳhāk-o-bād

ye merī ziist ḳhud ik mustaqil tūfān hai 'aḳhtar'
mujhe in ġham ke tūfānoñ se ghabrānā nahīñ aatā

dushvāriyoñ ko ishq ne āsāñ banā diyā
ġham ko surūr dard ko darmāñ banā diyā

rifāqat ahl-e-ġham kī ik nashāt-e-muḳhtalif hai
jo rakhte ho jigar meñ dard kā ghaao to aao

tālib ġham-nasīb kā husn-e-talab to dekhiye
ārzū-e-firāq hai daur-e-vafā-e-nāz meñ

ik ġham se hai ashkoñ ke ta.alluq kī vazāhat
maiñ ashk se patthar ko agar toḌ rahā huuñ

jaan aa bar meñ ki phir kuchh ġham-o-vasvās nahīñ
tū nahīñ paas to phir kuchh bhī mire paas nahīñ