Tags-Gham

ġham uThātā huuñ ġhazal kahtā huuñ jiitā rahtā huuñ
log kahte haiñ ki ik din 'mīr' ho jā.ūñgā maiñ

ek arse se ġham-e-hijr meñ masrūf hai tū
aa mire dil meñ tujhe kaam nayā detā huuñ

barsegī aaj dil kī zamīñ par ye TuuT kar
goyā 'zamān' ġham kī ghaTā mere saath hai

kisī se daulat-e-ġham aaj tak nahīñ bāñTī
hamesha chiTThī meñ dil-kash kathā.eñ bhejī haiñ

muñh chhupānā paḌe na dushman se
ai shab-e-ġham sahar na ho jaa.e

nashtar-e-ġham na jis ko raas aayā
ziist us ko kabhī na raas aa.ī

dil ko sharār-e-shola-e-ġham ne jalā diyā
pahlū se aa rahī hai jo ḳhushbū kabāb kī

ishq agar kījiye dil kījiye kis se ḳhālī
dard o ġham kam nahīñ is daur meñ ġham-ḳhvār kahāñ

mujhe ye dukh hai ki hasharāt-e-ġham tumhāre liye
maiñ ḳhurd-o-nosh kā sāmān kuchh dinoñ kā huuñ

ye dīvāne kabhī pābandiyoñ kā ġham nahīñ leñge
garebāñ chaak jab tak kar na leñge dam nahīñ leñge

ye ġham kis ne diyā hai pūchh mat ai ham-nashīñ ham se
zamāna le rahā hai naam us kā ham nahīñ leñge

ġham-e-dil hī ke māroñ ko ġham-e-ayyām bhī de do
ġham itnā lene vaale kyā ab itnā ġham nahīñ leñge

mujh se phir chhuTte hue abr-e-alam ne ye kahā
aaj kī shaam palaT ā.eñge ġham-ḳhvār tire

hastī ke kārḳhāna-e-āhan meñ ai 'sahar'
zanjīr-e-jāñ ko ġham se lagā.e hue haiñ ham

ḳhaak uḌātī huī rāteñ hoñ ki bhīge hue din
avval-e-sub.h ke ġham āḳhir-e-shab pūchhte haiñ

khāne ko ai harīs ġham-e-ishq kam nahīñ
ye ho to kuchh bhī fikr na kar qarz-o-vām kā

maiñ agarche kar bhī chukā raqam idhar ek daftar-e-rañj-o-ġham
magar intizār hai dam-ba-dam mujhe pahle ḳhat ke javāb kā

ġham tirā dil meñ mire phir aag sulgāne lagā
phir dhuāñ sā us se kuchh uThtā nazar aane lagā

shādī aane kī na kar yaar na jaane kā ġham
aayā kyā kyā na kuchh is jā na gayā kyā kyā kuchh

kuchh maut kā na ġham hai na kuchh rāhat-e-hayāt
kūche meñ us ke mujh ko bahār-o-ḳhizāñ hai hech