Tags-Gham

ik dard kā sahrā hai simaTtā hī nahīñ hai
ik ġham kā samundar hai jo ghaTtā hī nahīñ hai

dil mirā sāġhar-e-shikāyat hai
zahr-e-ġham bas ki be-nihāyat hai

ḳhanjar chalā ke mujh pe bahut ġham-zada huā
bhaa.ī ke har sulūk meñ shiddat lahū kī thī

'ḳhālid' har ek ġham meñ barābar sharīk thā
saare jahāñ ke biich rifāqat lahū kī thī

ġham-e-firāq mai o jaam kā ḳhayāl aayā
safed baal liye sar pe ik vabāl aayā

raat bhar dard kī sham.a jaltī rahī
ġham kī lau thartharātī rahī raat bhar

ishq meñ gul ke jo nālāñ bulbul-e-ġhamnāk hai
gul bhī us ke ġham meñ dekho kiyā garebāñ-chāk hai

kāfir o momin ko riqqat ġham meñ hai 'hasrat' ke haa.e
kuchh ḳhudā kā Dar bhī tujh ko ai but-e-bebāk hai

ḳhalvat banegī tere ġham-e-jāñ-navāz kī
leñge ye kaam apne dil-e-shādmāñ se ham

mirā mazāq uḌātā hai ā.īna lekin
mirī haqīqat-e-ġham us pe āshkār nahīñ

jab sīm-bar ke ġham se huā rañg juuñ talā
tab sab ne jā aziiz kiyā misl-e-zar mujhe

'hātim' huā huuñ āl-e-nabī kī panāh meñ
duniyā o diiñ ke ġham se nahīñ kuchh ḳhatar mujhe

bas yahī soch ke har roz likhā kartā huuñ
vo mirā ġham mire ash.ār meñ paḌhtā hogā

tañg ho jaa.e zamīñ bhī ab to koī ġham nahīñ
ham faqīroñ ke liye hai āsmāñ sar par khulā

na nashāt-e-visāl na hijr kā ġham na ḳhayāl-e-bahār na ḳhauf-e-ḳhizāñ
na saqar kā ḳhatar hai na shauq-e-iram na sitam se hazar na karam se ġharaz

tirī yaad ho aur dil-e-bedam ho tirā dard ho aur dil-e-bedam ho
'bedam' ko rahe tire ġham se ġharaz tire ġham ko rahe 'bedam' se ġharaz

vāqa.ī dariyā-e-ġham ke tez dhāroñ meñ 'razā'
zindagī merī ḳhas-o-ḳhāshāk ho jā.egī kyā

ġham ke hāthoñ mire dil par jo samāñ guzrā hai
hādisa aisā zamāne meñ kahāñ guzrā hai

hāl-e-dil ġham se ye hai jaise kisī sahrā meñ
abhī ik qāfila-e-nauha-garāñ guzrā hai

ġham-e-firāq meñ dil kyuuñ na dard-mañd rahe
bahār aa ke ga.ī ham qafas meñ band rahe