Tags-Gham

ḳhushiyāñ dete dete aksar ḳhud ġham meñ mar jaate haiñ
resham bunñe vaale kiiḌe resham meñ mar jaate haiñ

hañse bhī ro.e bhī lekin na samjhe
ḳhushī kyā chiiz hai duniyā meñ ġham kyā

mubārak zālimoñ ko zulm ham par
jo apnā hī kiyā hai us kā ġham kyā

nahīñ jab quvvat-e-ehsās dil meñ
ġham-e-duniyā surūr-e-jām-e-jam kyā

misāl is kī kahāñ hai koī zamāne meñ
ki saare khone ke ġham paa.e ham ne paane meñ

allāh-re shām-e-ġham mirī be-iḳhtiyāriyāñ
ik dil hai paas vo bhī nahīñ iḳhtiyār meñ

ishratoñ ke mutalāshī ġham se kyuuñ gurezāñ hai
tīrgī ke parde meñ raushnī kā sāmāñ hai

dhuup ho ki bārish ho tū hai monis-o-hamdam
mujh pe ye tirā ehsāñ ai ġham-e-farāvāñ hai

kaaTī hai ġham kī raat baḌe ehtirām se
aksar bujhā diyā hai charāġhoñ ko shaam se

pahlū meñ bhī tire ġham-e-daurāñ kā Dar rahā
kār-e-jahāñ ne yuuñ mirī miTTī ḳharāb kī

tumhārī zulf ko suljhā.eñge vo dīvāne
jo apne chāk-e-garebāñ kā ġham nahīñ karte

utar chukā hai rag-o-pai meñ zahr-e-ġham phir bhī
ba-pās-ahd-e-vafā chashm nam nahīñ karte

bazm-e-tarab bhī sajī mahfil-e-ġham bhī sajī
kaun milā thā mujhe kaun judā ho gayā

ġhamoñ meñ mere ḳhushī chhupī hai ḳhushī meñ merī chhupe hue ġham
ajab laḌā.ī maiñ laḌ rahā huuñ mujhe duāoñ meñ yaad rakhnā

is kā.enāt-e-ġham kī fasurda fazāoñ meñ
bikhrā ga.e haiñ aa ke vo kuchh muskurāhaTeñ

ghir ga.e ham vaqt ke tūfān meñ
ai ġham-e-jānāñ kahāñ hai āj-kal

dard-o-ġham kī hikāyateñ mat pūchh
dil pe guzrī qayāmateñ mat pūchh

be-ḳhudī merī be-ḳhudī na rahe
itnā ehsān ġham-gusār na kar

svād-e-ġham ho yā bazm-e-tarab kuchh bhī nahīñ hotā
zabāñ marham rakkhe yā zaḳhm ab kuchh bhī nahīñ hotā

bas tere ġham meñ aa kar ab ḳhaak ho ga.e ham
dil bujh gayā hamārā ik baar sab taraf se