Tags-Gham

ajiib tarah se raushan huī hai ḳhalvat-e-ġham
ki raushnī hai bahut aur diyā jalā bhī nahīñ

zulmat-e-shab hī sahar ho jā.egī
shiddat-e-ġham chārāgar ho jā.egī

bād-e-tāmīr-e-makāñ zanjīr-e-ġham
ulfat-e-dīvār-o-dar ho jā.egī

sub.h-e-rāhat ke tasavvur ke tufail
har shab-e-ġham muḳhtasar ho jā.egī

qalam udaas hai sahme hue haiñ saare varaq
ġham-e-hayāt na yuuñ shā.irī pe taarī rakh

is tarah duniyā meñ dil ko mahram-e-ġham kījiye
jab ḳhushī koī mayassar ho to mātam kījiye

ishq se phir silsila jumbānī-e-ġham kījiye
zindagī par maut ko pahle muqaddam kījiye

maut kā kyā maut kā to sau tarah ġham kījiye
zindagī nāshād kā kis tarah mātam kījiye

dekh kar ahl-e-tarab kā sāz-o-sāmān-e-tarab
bad-nasīboñ kā zarā andāza-e-ġham kījiye

ġham ko hone dījiye ho jis qadar mānūs dil
dil ko jitnā ho sake begāna-e-ġham kījiye

ho jin se ġham-e-tīrgī-e-shab kā mudāvā
aise hī ujāloñ ko sahar ham ne kahā hai

garebān vahshat ne phāḌā to kyā ġham
ḳhudā rakhne vaalā hai parda hamārā

tairtī rahtī haiñ mere ḳhuuñ meñ ġham kī kirchiyāñ
kāñch kī sūrat badan meñ TūTtā rahtā huuñ maiñ

karb meñ pyaar ke naġhmāt sunā.īñ kaise
ġham haqīqat se haqīqat ko chhupā.eñ kaise

mire e'timād ko ġham milā mirī jab kisī pe nazar ga.ī
isī justujū isī karb meñ mirī saarī umr guzar ga.ī

mujhe zabt-e-ġham kā na de sabaq zarā apne haal pe kar nazar
mirī uljhanoñ ke ḳhayāl se tirī zulf bhī to bikhar ga.ī

ġham kī chhā jā.egī duniyā meñ ghaTā mere ba.ad
aur barseñge bahut tīr-e-balā mere ba.ad

bijliyāñ chamkeñgī ālām-o-masā.ib kī agar
ġham kī chal jā.egī har samt havā mere ba.ad

un ke chehre ko maiñ is tarah paḌhā kartā huuñ
jaise ġham kī koī tafsīr ġhazal meñ aa.e

un kī sūrat nazar nahīñ aatī
shab-e-ġham kī sahar nahīñ aatī