Tags-Gham

ġham hazāroñ dil-e-hazīñ tanhā
bojh kitne haiñ aur zamīñ tanhā

muñh ko aa jaatā hai jigar ġham se
aur gila tā-ba-lab nahīñ aatā

siine meñ mire dāġh-e-ġham-e-ishq-e-nabī hai
ik gauhar-e-nāyāb mire haath lagā hai

bhaTak na jaa.e kahīñ shahr-e-ġham meñ apnā dil
so tere ḳhvāb ko maiñ rahnumā banātā huuñ

aaj to chain se rone do mujhe goshe meñ
ek muddat pe ġham-e-dil se judā.ī huī hai

pūchhoge to khul jā.egī zaḳhmoñ kī zabāñ aur
purshish to guzartī hai ġham-e-dil pe girāñ aur

havā-e-shām-e-judā.ī hai aur ġham lāhaq
na jaane jism kī dīvār kab bikhar jaa.e

dard-mandoñ ko kyā davā se kaam
ġham-nasīboñ ko kyā ḳhushī se ġharaz

fikr-e-jahāñ mujhe na ġham-e-rozgār hai
phir bhī na jaane kis liye dil be-qarār hai

shām-e-firāq shiddat-e-ġham be-shumār hai
mushtāq-e-dīd aañkh bhī ab ashk-bār hai

be-karāñ dariyā huuñ ġham kā aur tuġhyānī meñ huuñ
sab hadeñ haiñ phir bhī qaa.em kab se hairānī meñ huuñ

agar mar kar phir uThnā hai to marne kī ḳhushī kyā hai
badan khone kā ġham jiine kī ḳhushiyoñ se sivā hogā

hai rashk-e-vasl se ġham-e-dildār hī bhalā
rāhat se aisī ham ko vo dil-āzār hī bhalā

zaḳhmoñ se ġham ke terā kaleja to chhil gayā
bulbul hai aise gul se tujhe ḳhaar hī bhalā

hujūm-e-rañj-o-ġham ne is qadar mujh ko rulāyā hai
ki ab rāhat kī sūrat mujh se pahchānī nahīñ jaatī

ġham mujhe dete ho auroñ kī ḳhushī ke vāste
kyuuñ bure bante ho tum nāhaq kisī ke vāste

isī ḳhayāl se palkoñ pe ruk ga.e aañsū
tirī nigāh ko shāyad subūt-e-ġham na mile

na pūchh hālat marīz-e-ġham kī ghaḌī meñ kuchh hai ghaḌī meñ kuchh hai
tabīb tashvīsh meñ paḌā hai qazā khaḌī muskurā rahī hai

mirī shab-e-ġham kā pūchhnā kyā ajiib pesh-e-nazar hai manzar
ye zindagī jhilmilā rahī hai ki niiñd tāroñ ko aa rahī hai

mazā aatā nahīñ tham tham ke ham ko rañj-o-rāhat kā
ḳhushī ho ġham ho jo kuchh ho ilāhī nā-gahāñ kyuuñ ho