Tags-Ghar

abas ghar se apne nikāle hai tū
bhalā ham tujhe chhoḌ kar jā.eñge

mire bachche ye kahte haiñ
''tum aatī ho to ghar meñ raunaqeñ ḳhushbueñ aatī haiñ

kaun jaane kis ke Dar se aaj phir merā rafīq
chāhtā thā mere ghar aanā magar aayā nahīñ

dil ko kyā kahiye ki vo qātil ke ghar ḳhud hī gayā
laakh koshish kī magar vo raah par aayā nahīñ

maiñ kaafī der pahle jis ko ghar meñ chhoḌ aayā thā
khaḌā hai muñh phulā.e ab vahī mahtāb raste meñ

ghar meñ bhī huuñ aur mujh ko dasht meñ bhī
dhuup meñ jalte hue dekhā gayā hai

hai mukammal bādshāhī kī dalīl
ghar meñ gar ik boriyā maujūd hai

be-nūr na kar jaa.e fasādāt kī āñdhī
lau ghar ke charāġhoñ kī zarā aur bhī kar tez

vo ghar jo ujlā ujlā sā lagtā thā
jhāḌā poñchhā to kitnī miTTī niklī

nā-umīdī ke ye shab-zād Darāte haiñ mujhe
tere aane se munavvar mirā ghar ho ki na ho

ye paḌī haiñ sadiyoñ se kis liye tire mere beach judā.iyāñ
kabhī apne ghar tū mujhe bulā kabhī rāste mire ghar ke dekh

us ko ruḳhsat to kiyā thā mujhe ma.alūm na thā
saarā ghar le gayā ghar chhoḌ ke jaane vaalā

aap kyā aa.e ki ruḳhsat sab andhere ho ga.e
is qadar ghar meñ kabhī bhī raushnī dekhī na thī

sharīfe ke daraḳhtoñ meñ chhupā ghar dekh letā huuñ
maiñ āñkheñ band kar ke ghar ke andar dekh letā huuñ

mirā ghar terī manzil gaah ho aise kahāñ tāle.a
ḳhudā jaane kidhar kā chāñd aaj ai māh-rū niklā

log to jā ke samundar ko jalā aa.e haiñ
maiñ jise phūñk kar aayā vo mirā ghar niklā

phir us jahān meñ kaise raheñ kahāñ jaa.eñ
vatan bhī koī na ho aur ghar bhī koī na ho

dekh kar bām-o-dar kā sannāTā
bol uThtā hai ghar kā sannāTā

ho na ho koī aane vaalā hai
kah rahā hai ye ghar kā sannāTā

sahrā ko chhoḌ deñ to kahāñ jā ke ye raheñ
āvārgān-e-ishq-o-mohabbat kā ghar bhī hai