Tags-Ghar

tabassum meñ bhī dil ġham kī jhalak pahchān letā hai
ye dard-o-ġham azal se rahne vaale haiñ isī ghar ke

jis ghaḌī rāh-e-pur-ḳhār maiñ ne chunī saath us ne bhī azm-e-safar kar liyā
sub.h sūraj nikalne se pahle chale, jis jagah ho ga.ī raat ghar kar liyā

hāsidoñ ke maiñ ta.anoñ kā suntā rahā, reza reza vajūd apnā chintā rahā
bārish-e-sañg meñ bhī na pīchhe haTā, maiñ ne us dil ko patthar kā ghar kar liyā

maiñ ne bachpan guzārā hai apnā yahāñ us ke saa.e meñ pal kar huā maiñ javāñ
kaise bhūlūñ maiñ 'ḳhusrav' ye kachchā makāñ, us makāñ ne mire dil meñ ghar kar liyā

ghar ke charāġh ne aag lagā dī bastī meñ
maiñ sūraj dahlīz pe laane vaalā thā

bāhar havā-e-tez lagā.e hue hai ghaat
ghar se jo nikle ab ki palaT kar na aaoge

mashvare karte haiñ jo ghar ko sajāne ke liye
un se kis tarah kahūñ maiñ bhī to ghar rakhtā thā

ghar se tire dīvāne ne jab paañv nikālā
chhāloñ ne qadam le liye zanjīr se pahle

ye kaisā ghar hai jis ke makīnoñ ko har ghaḌī
dhaḌkā sā ek larzish-e-dīvār-o-dar kā hai

hasīn ḳhvāb agar dil meñ ghar nahīñ kartā
tavīl raat se maiñ dar-guzar nahīñ kartā

shikasta chhat meñ parindoñ ko jab Thikāna milā
maiñ ḳhush huā ki mire ghar ko bhī gharānā milā

koī din ghar se na nikle hai agar vo ḳhurshīd
muntazir shaam talak ek jahāñ rahtā hai

laḌe the saath mil kar ham charāġhoñ ke liye lekin
hamāre ghar añdhere haiñ tumhāre ghar ujāle haiñ

kaam itne haiñ bayābānoñ ke vīrānoñ ke
shaam ho jaatī hai aur ghar nahīñ dekhā jaatā

ghar kī khiḌkī se jhoñkne vaalā
merī āñkhoñ se jhāñktā mujh meñ

pyāse the to paanī ko pukārā thā hamīñ ne
naddī idhar aa.ī hai to ghar le ke ga.ī hai

kis se pūchhūñ ki kahāñ hai mirā rone vaalā
is taraf maiñ huuñ mire ghar se udhar sannāTā

maiñ palaT jā.ūñ apne ghar kī taraf
aap bhī apnā rāstā dekheñ

tamām rāste muḌ kar yahīñ pahuñchte haiñ
vo is ḳhayāl se ab apne ghar meñ rahtā hai

isī umiid pe 'hamdam' gunāh kartā huuñ
ḳhudā ke ghar meñ karam kī kamī nahīñ hotī