Tags-Ghar

bahut āb-o-havā kā qarz vājib hai magar ham par
ye ghar jab tañg ho jaate haiñ phir galiyoñ meñ aate haiñ

be-dar-o-bām Thikānā jis meñ dhuul dhuup sannāTā ġham
vahī hai mujh vahshī ke ghar meñ jo kuchh hai vīrānoñ meñ

aate hī tū ne ghar ke phir jaane kī sunā.ī
rah jā.ūñ sun na kyūñkar ye to burī sunā.ī

tai huā din ki khule shaam ke bistar chaliye
paañv ko hukm thakan kā hai ki ab ghar chaliye

raah meñ bhiiḌ Darātī hai to ghar jaate haiñ aur
ghar kī tanhā.ī ye kahtī hai ki bāhar chaliye

ajiib baat hai dekhā na thā kisī ne use
ajiib baat hai ghar ghar usī kā charchā thā

ḳhush-fahmiyoñ kī baat alag hai magar ye ghar
jis ke liye sajā hai vo mehmān tum nahīñ

vo ḳhudā jaane ghar meñ haiñ ki nahīñ
kuchh khulā aur kuchh hai band kivāḌ

māl-o-zar de diyā hasīnoñ ko
rah gayā ghar meñ sirf kāTh-kabāḌ

lāzmī thā umiid andhī honā
raat ke ghar jamāl aayā hai

kitne bedard haiñ is shahr ke rahne vaale
raah meñ chhīn ke dil kahte haiñ ghar jaate haiñ

log TuuT jaate haiñ ek ghar banāne meñ
tum taras nahīñ khāte bastiyāñ jalāne meñ

ghar kar ga.iiñ dil meñ vo mohabbat kī nigāheñ
un tīroñ kā zaḳhmī huuñ jo paikāñ nahīñ rakhte

chhoḌā na rashk ne ki tire ghar kā naam luuñ
har ik se pūchhtā huuñ ki jā.ūñ kidhar ko maiñ

andhere ghar meñ charāġhoñ se kuchh na kaam liyā
ki apne aap se yuuñ ham ne intiqām liyā

havā hī aisī chalī hai har ek sochtā hai
tamām shahr jale ek merā ghar na jale

dhuāñ dhuāñ nazar aatī haiñ shahr kī galiyāñ
sunā hai aaj sar-e-shām ghar ga.e haiñ log

ye aur baat ki ghar bujh ga.e haiñ ai 'shā.er'
magar vatan meñ charāġhāñ to kar ga.e haiñ log

guzrī jo rahguzar meñ use darguzar kiyā
aur phir ye tazkira kabhī jā kar na ghar kiyā

āzurdagān-e-hijr kī vahshat ajiib hai
nikle na ghar se aur na ābād ghar kiyā