Tags-Ghar

ajab insān huuñ ḳhush-fahmiyoñ ke ghar meñ rahtā huuñ
maiñ jis manzar meñ huuñ gum us ke pas-e-manzar meñ rahtā huuñ

ye apnā ghar maiñ sar-e-rāh le to aayā huuñ
badal le rāsta sūraj to phir sarāhat hai

talāsh-e-ahd-e-rafta meñ ajā.ib-ghar bhī dekhe haiñ
vahāñ bhī sab havāle haiñ kahīñ tere kahīñ mere

maiñ ne kahā ḳhudā se ḳhudā ne kahā mujhe
ghar se koī galī meñ nikal kyuuñ nahīñ rahā

havā kī shah pe jalātā hai ghar ġharīboñ ke
'navāz' aise diye ko diyā kahūñ kaise

shaam aa.ī to terā ḳhayāl aa gayā
aa.ina mere ghar kā sañvarne lagā

apnoñ meñ tanhā.ī kā ab ehsās na pūchh
ghar vāloñ se be-ghar achchhā lagtā hai

lahū-luhān sā manzar hamārī aañkh meñ hai
hamārā jaltā huā ghar hamārī aañkh meñ hai

tere shams-o-qamar mire kis kaam
mere ghar meñ hai tīrgī kā dukh

mujh ko bhī jāgne kī aziyyat se de najāt
ai raat ab to ghar ke dar-o-bām so ga.e

ghar meñ bulāyā hai to kuchh muñh se do
sīkho ye Dhab ham se mudārāt kā

ghane banoñ meñ shañkh bajāne vaalā tū
tirī taraf ghar chhoḌ ke aane vaalā maiñ

ḳhalā ke dasht se ab rishta apnā qat.a karūñ
safar tavīl hai behtar hai ghar ko lauT chalūñ

nāla-e-dil kī sadā dīvār meñ hai dar meñ hai
suur yā mahshar meñ hogā yā hamāre ghar meñ hai

maiñ pareshāñ ho ke niklūñgā to un kī bazm se
merī barbādī kā sāmāñ hai to un ke ghar meñ hai

āñkhoñ se isī tarah agar sail ravāñ hai
duniyā meñ koī ghar na rahā hai na rahegā

paḌos vālo! darīchoñ ko mat khulā chhoḌo
tumhāre ghar se bahut raushnī nikalne lagī

dīvār ḳhasta-hāl hai aur dar udaas hai
jab se koī gayā hai mirā ghar udaas hai

mujh ko le jā pyaas apas ghar meñ
bāda-e-vasl phir pilātā hai

ye dasht vo hai jahāñ rāsta nahīñ miltā
abhī se lauT chalo ghar abhī ujālā hai