Tags-Ghar

charāġh jalte hī bīnā.ī bujhne lagtī hai
ḳhud apne ghar meñ hī ghar kā nishāñ nahīñ miltā

ye mirā ahd hai tāvīl-e-sukūnat de kar
ghar ke darvāze ko dīvār banā detā hai

tasavvur ḳhāna-ābādī karegā
tire ghar maiñ rahūñgā mere ghar tū

jannat kā sabz-bāġh na zāhid dikhā mujhe
mere bhī ghar meñ peḌ lagā hai anaar kā

jab tū ne hī nigāh meñ rakkhā nahīñ hameñ
ab aur kisī kī ruuh meñ ghar kis liye kareñ

tirī yādoñ kī paa.el sī khanaktī hai mire ghar meñ
mire kamre ke andar gūñjtī hai dar pe rakkhī hai

ab is āshuftagī meñ kyā batā.eñ silsila apnā
kabhī jo ḳhāndānī thī sharāfat ghar pe rakkhī hai

tūfān kī maujoñ meñ ghir kar pahuñchā bhī hai koī sāhil tak
sab yaas ke aalam meñ dil ko samjhāne kī bāteñ hotī haiñ

sub.h le jaate haiñ ham apnā janāza ghar se
shaam ko phir ise kāñdhoñ pe uThā laate haiñ

shahr kī bhiiḌ meñ kyā ho isī ḳhātir 'āzar'
apnī pahchān ko ham ghar meñ hī chhoḌ aate haiñ

ḳhalvat-e-dil tire liye ā.ūñgī jald lauT ke
milne ko aa.e mehmāñ ghar ke do chaar kaam haiñ

ghar ke baare meñ yahī jaan sakā huuñ ab tak
jab bhī lauTo koī darvāza khulā hotā hai

sar ko na pheñk apne falak par ġhurūr se
tū ḳhaak se banā hai tirā ghar zamīn hai

ā.īne kī tarah se nazar hai tū dekh le
raushan-diloñ kī ghar kī munavvar zamīn hai

shāyad nahā ke aaj nichoḌī hai tū ne zulf
ghar kī tamām terī muambar zamīn hai

kuchh nahīñ, ghar meñ mire kuchh bhī nahīñ
koī kapḌā ki harārat ko badan meñ rakhtā

ham qanā.at pe guzar karte haiñ 'āqib' ham ko
kachchī dīvāroñ kā ik ghar bhī bahut lagtā hai

sajā ke dhuup kaḌī aaj ghar se nikle haiñ
kisī ke saa.e ko zer-e-qabā bhī rakkhā hai

kisī tarah se bhī raunaq baḌhe mire ghar kī
bujhā huā hī sahī ik diyā bhī rakkhā hai

chupke chupke rote haiñ muñh par dupaTTa taan kar
ghar jo yaad aayā kisī kā apne ghar meñ aan kar