Tags-Ghar

tere ḳhayāl ke dīvār-o-dar banāte haiñ
ham apne ghar meñ bhī terā hī ghar banāte haiñ

lagtā hai yuuñ qayām hai apnā sarā.e meñ
ham jis makān meñ haiñ vo ghar ho nahīñ rahā

kisī bhī ghar meñ sahī raushnī to hai ham se
numūd-e-sub.h se pahle to mat bujhāo hameñ

jalāyā jis ne mirā ghar usī diye ke liye
havā chale to maiñ fānūs hone lagtā huuñ

ik e'timād thā baaqī so uTh gayā vo bhī
ki bhaa.ī bhaa.ī ke ghar kā patā nahīñ detā

phuul toḌe haiñ bujhā.e haiñ mire ghar ke charāġh
dushmanā terī ḳhatā.eñ nahīñ dekhī jātīñ

ai dil ai mere dil ye sunā hai ki shaam ko
ghar se vo chal paḌe the magar raat ho ga.ī

terī vahshat kī badaulat ai dil
ghar bayābān huā jaatā hai

dil se jaate haiñ mire sabr-o-qarār
ghar ye vīrān huā jaatā hai

ek naqsh aisā banāyā hai tirī yādoñ ne
zehan se ruuh talak terā hī ghar lagtā hai

añdherā māñgne aayā thā raushnī kī bhiik
ham apnā ghar na jalāte to aur kyā karte

nikaltī thī jo raushnī dekhne
kisī tiira ghar kī makīñ raat thī

andar andar khokhle ho jaate haiñ ghar
jab dīvāroñ meñ paanī bhar jaatā hai

naqqād-e-ḳhushk-zauq ke ghar ho rahā hai jashn
aaj us ne saare misra-e-tar kaaT Daale haiñ

aa kar kisī bhī baaġh meñ mil jaa.e ḳhair hai
gorī agar na ghar pe bulā.e to baat hai

shahr kā manzar hamāre ghar ke pas-e-manzar meñ hai
ab udhar bhī ajnabī chehre nazar aane lage

sochte haiñ kaaT deñ āñgan ke peḌoñ ko 'shafaq'
ghar kī bāteñ ye galī-kūche meñ phailāne lage

ghar base bol bhī kuchh kyā hai ḳharābī Thānī
kab talak ham se phiregā yūñhī phaTkā phaTkā

ik aas jo dil kī TuuT ga.ī phir dil kī ḳhushī baaqī na rahī
jaise ki añdhere ghar kā diyā gul ho to añdherā chhā jaa.e

ḳhudā kā ghar ho jo TuuTe jihād-e-nafs se dil
ḳharāb ho to bane lā-makāñ ye ḳhāna-e-ishq